«Հայաստանից ուզում են խլել հերոսության խորհրդանիշը». այդպես է գնահատել փորձագետը Բերձորի կորուստը
ՔԱՂԱՔԱԿԱՆՈՒԹՅՈՒՆRossaprimavera.ru-ն գրում է, որ Բերձոր քաղաքը հայկական զենքի հաղթական փառքի խորհրդանիշն է, ուստի ուզում են այն խլել հայերից: Այդ մասին ֆեյսբուքյան իր էջում գրել է իրանագետ Վարդան Ոսկանյանը։
«Բերձորը սոսկ բնակավայր չէ, այն խորհրդանիշներից է, որոնք ցույց են տալիս Հայաստանը որպես այնպիսի ազգ և պետություն, որը կարող է ջարդել թշնամուն և ոտնահարել հայերի մասին այն դարավոր կարծրատիպը, որ այդ ազգը «թշվառ և անզոր է»», - գրել է Ոսկանյանը։
Փորձագետը կարծում է, որ այդ քաղաքը Ադրբեջանի վերահսկողության տակ հանձնելու նպատակը կարող է լինել միայն Հայաստանի մարտական ոգին կոտրելու ցանկությունը։
«Բերձորը հետանկախության շրջանի հայկական զենքի հաղթական փառքի վերջին խորհրդանիշներից է, և նա ամեն օր մեզ հիշեցնում է մեր հերոսական ոչ վաղ անցյալի մասին։ Ուստի, ըստ բարբարոսների, մենք պետք է զրկվենք դրանից, նրանց ցանկությունն է արյունոտել ոչ միայն մարմինը, այլ նաև Հայաստանի ոգին»,- նկատել է փորձագետը։
Հիշեցնենք, որ Լեռնային Ղարաբաղում հրադադարի մասին 2020 թվականի նոյեմբերի 9-ի եռակողմ հայտարարության համաձայն, որը դադարեցրեց 44-օրյա պատերազմը, նախատեսվում է կառուցել նոր ճանապարհ, որը կկապի Հայաստանն ու Արցախը (Լեռնային Ղարաբաղ)՝ սակայն շրջանցելով Բերձորի (Լաչին) միջանցքում մնացած մի շարք հայկական համայնքները։ Դրանց թվում են Աղավնոն, Ներքին Սուս և Սուս գյուղերը, ինչպես նաև Բերձոր (Լաչին) քաղաքը։
Հուլիսի 29-ին Հայաստանի տարածքային կառավարման և ենթակառուցվածքների նախարարությունը հաստատել է, որ Մ-12/-Տեղ-Կոռնիձոր ավտոճանապարհի վերակառուցման աշխատանքները կսկսվեն 2022 թվականի օգոստոսին։ Արցախի Հին Շեն և Մեծ Շեն գյուղերով անցնող այդ ճանապարհը այլընտրանք է դառնալու Լաչինի միջանցքին։
Երբ այդ այլընտրանքային ճանապարհն ավարտվի, Ադրբեջանը պետք է վերահսկողության տակ վերցնի թվարկված հայկական համայնքները, ներառյալ Բերձոր քաղաքը, իսկ ռուս խաղաղապահները պետք է անցնեն նոր երթուղի:
Նշենք, որ Ղարաբաղյան երկրորդ պատերազմի վերջին օրերին կատաղի մարտեր են ընթացել Բերձորի և Լաչինի միջանցքի վերահսկման համար։ Արցախի ՊԲ-ն կարողացել է հաջողությամբ պաշտպանել քաղաքը։
Նյութը հրապարակման պատրաստեց Կամո Խաչիկյանը