Հայաստանն ԱԹՍ-ներ է օգտագործել Սոթքի մարտերում

Ադրբեջանը երեկ մարտական գործողություններ էր սկսել Վարդենիսի հատվածում։ Սոթքի հայկական դիրքերի վրա հարձակման հետևանքով զոհվել է երեք հայ զինծառայող, ևս երկուսը վիրավոր են։ Ի սկզբանե պաշտպանության նախարարությունը հաղորդում էր 4 զոհի մասին, սակայն նրանցից մեկի՝ Նարեկ Պողոսյանին, կարողացել են ռեանիմացիոն ինտենսիվ միջոցառումների արդյունքում վերականգնել սրտի զարկը։ Զինծառայողը գտնվում է ծայրահեղ ծանր վիճակում, և ռեանիմացիոն գործողությունները նրա կյանքը փրկելու համար շարունակվում են։

Ադրբեջանը վերջին շրջանում զգալի ավելացրել է իր ռազմատենչ հռետորաբանությունը, ինչպես նաև ամենօրյա կտրվածքով, երբեմն էլ օրական մի քանի անգամ ապատեղեկատվություններ էր տարածում՝ փորձելով հիմքեր ստեղծել էսկալացիայի համար։ Հայկական բանակը զարմանալիորեն երեկ լավ պատասխան է տվել հակառակորդին։ Նախնական տեղեկություններով ադրբեջանցիները հինգ և ավելի զոհ ունեն, ընդ որում Հայաստանը նաև մարտական անօդաչու սարքեր է կիրառել, որոնց միջոցով արկեր նետել ադրբեջանական դիրքերի ուղղությամբ։ Թեև Ադրբեջանը փորձում է համոզել, որ այդ անօդաչուները Հայաստանը գնել է այլ երկրներից, բայց Հայաստանի պաշտոնական աղբյուրների փոխանցմամբ՝ դրանք արտադրվել են հենց Հայաստանում և զարմանալիորեն, 44-օրյա պատերազմից հետո առաջին անգամ, հայկական կողմը ցուցադրում էր հայկական անօդաչուներից կատարված մարտական առաջադրանքների տեսանյութերը։

Կշարունակի՞ արդյոք Ադրբեջանը մարտական նոր ագրեսիաներ իրականացնել և ինչպես կպատասխանի հայկական բանակը, դեռևս վաղ է ասել, սակայն մի բան հստակ է, որ նույնիսկ գործող իշխանությունների հարուցած խոչընդոտների պայմաններում, հայ զինվորը մարտական է տրամադրված և կարողանում է հակառակորդին լուրջ կորուստներ հասցնել։ Ցավոք, երբեմն նաև զոհվում են մեր զինծառայողները։

Արման Սարիբեկյան