Իսրայելը չի համաձայնի զինադադարի, ինչպես ԱՄՆ-ը հրադադարի չէր համաձայնի Փերլ Հարբորից հետո. Նեթանյահու
ՄԻՋԱԶԳԱՅԻՆ
Իսրայելի ցամաքային ուժերը մոտեցել են Գազային։ Հետևակը, ուժեղացված տանկերով, հետախուզական արշավանքներ է իրականացնում քաղաքի ծայրամասերում։ Այս մասին հայտնում է Euronews-ը։
Հաղորդվում է, որ զրահամեքենաները փակել են գլխավոր մայրուղին, որը կապում է անկլավի հյուսիսը հարավի հետ։ Սա բնակչության տարհանման համար հարմար միակ երթուղին է։ Իսրայելի վարչապետը հայտարարել է ՀԱՄԱՍ-ի հետ պատերազմի երրորդ փուլի մեկնարկի մասին։ Նախարարների խորհրդի նիստում Բենիամին Նեթանյահուն բացատրել է. «Առաջին փուլը զսպումն էր, երկրորդը՝ օդային հարվածները, և այժմ եկել է ցամաքային ճանապարհով առաջխաղացման փուլը»։
Միեւնույն ժամանակ, Իսրայելի պաշտպանության բանակը շարունակում է ավիահարվածներ հասցնել Գազայի հյուսիսային հատվածում։ Թիրախներ են խոցվել նաև հարավում՝ Ռաֆահում։ Պայթյուններ որոտացել են հիվանդանոցների մոտ, որոնք Իսրայելը նախապես հրահանգել էր տարհանել, ինչից բժիշկները հրաժարվել են՝ ծանր վիճակում գտնվող հիվանդների մեծ թվի պատճառով։ Բուժհաստատություններում նաև պատսպարվում են հազարավոր պաղեստինցիներ։
Նեթանյահուն հաստատել է, որ Իսրայելը չի դիտարկում Գազայի հատվածում հրադադարի հաստատման հնարավորությունը և մտադիր է շարունակել իր ռազմական գործողությունը պաղեստինյան արմատական ՀԱՄԱՍ կազմակերպության դեմ։ «Ես ուզում եմ հստակեցնել Իսրայելի դիրքորոշումը հրադադարի վերաբերյալ: Ինչպես ԱՄՆ-ը չէր համաձայնի Փերլ Հարբորի ռմբակոծումից կամ սեպտեմբերի 11-ի ահաբեկչությունից հետո զինադադարի հետ, այնպես էլ Իսրայելը չի համաձայնի ՀԱՄԱՍ-ի դեմ ռազմական գործողությունների դադարեցմանը՝ հոկտեմբերի 7-ի սարսափելի հարձակումներից հետո»,- մամուլի ասուլիսին ասել է նա։
Բենյամին Նեթանյահուն ՀԱՄԱՍ-ի կողմից հրապարակված իսրայելցի պատանդների տեսանյութը դաժան հոգեբանական քարոզչություն է անվանել։ Գրոհայինների հրապարակած կադրերում երեք կին է։ Նրանցից մեկը դիմում է վարչապետին և կշտամբում իշխանություններին, որ չեն կարողացել հոկտեմբերի 7-ին երկրի հարավում ՀԱՄԱՍ-ի հարձակումից պաշտպանել խաղաղ բնակիչներին։ Նա կոչ է անում պատանդներին փոխանակել իսրայելական բանտերում գտնվող պաղեստինցիների հետ։
«Ես գրկում եմ ձեզ։ Մեր սրտերը ձեր և մյուս առևանգվածների հետ են։ Մենք ամեն ինչ անում ենք բոլոր առևանգված և անհայտ կորածներին տուն վերադարձնելու համար»,- վարչապետի խոսքը մեջբերում է նրա աշխատակազմը։
Հաղորդագրության մեջ նշվում են պատանդների անունները՝ Ելենա Տրուպանովա, Դանիել Ալոնի և Ռամոնա Կիրշտ։ Ինչպես գրում է Israel News-ը, Ալոնին և Տրուպանովան ընտանիքի անդամների հետ առևանգվել են կիբուց Նիր-Օզից։ Տրուպանովայի ամուսինը՝ Վիտալին սպանվել է։ Կիրշտը առևանգվել է կիբուց Նիրիմում՝ ամուսնու հետ միասին։
Իսրայելի զինվորականների տվյալներով՝ Գազայի հատվածում 239 պատանդ է պահվում։ ՀԱՄԱՍ-ն ավելի վաղ հայտարարել էր, որ պատրաստ է ազատ արձակել նրանց՝ պաղեստինցի բանտարկյալների ազատ արձակման և Գազայի հատվածում հրետակոծությունների դադարեցման դիմաց։
