Մենք հույսներս պետք է դնենք մեզ վրա
ՔԱՂԱՔԱԿԱՆՈՒԹՅՈՒՆ1or.am կայքի զրուցակիցը «Իմ քայլը» խմբակցության պատգամավոր Բաբկեն Թունյանն է։
- Պարոն Թունյան, այսօր վարչապետ Նիկոլ Փաշինյանը հայտարարել է, որ մեզ հաջողվել է դիվանագիտական հաղթանակ տանել, քանի, որ միջազգային հանրությունը հստակ արձանագրել է, որ ադրբեջանա-թուրքական տանդեմը Արցախի ու Հայաստանի դեմ կռվում է վարձկան-ահաբեկիչների օգնությամբ։ Արդյո՞ք այս հայտարարությունը չի վկայում, որ միջազգային հանրության կողմից Թուրքիայի և Ադրբեջանի դեմ որևէ պատժամիջոց կկիրառվի։
— Չեմ կարող հստակ հետևանքը ասել, պատժամիջոց կլինի՞ թե մեկ այլ գործողություն, բայց, որ արձագանքը կա, դա նշանակում է, որ այդ փաստն ընդունված է միջազգային հանրության կողմից ու այստեղ պետք է ջանքեր գործադրել, որ այդ ամենը միայն հայտարարությամբ չսահմանափակվի։ Թե կոնկրետ ինչ կհետևի, այս պահին որևէ մեկը հստակ ասել չի կարող։
- Թուրքիան արդեն բացահայտ մասնակցում է Արցախի դեմ մղվող պատերազմին, անգամ թուրքական F-16 կործանիչը հայկական զինուժի «Սու-25» է խոցում: Սակայն Թուրքիան հերքում է F-16 կործանիչի օգտագործումը և, եթե մեզ հաջողվի ապացուցել, որ Թուրքիան իսկապես կիրառել է F-16, ապա ի՞նչ հետևանքներ կարող է ունենալ դա Թուրքիայի և Ադրբեջանի համար։
— Դա արդեն միջազգային իրավունքի հարց է, և ես չեմ ուզում պատասխանել, քանի որ ես ինքս դրան մասնակից չեմ, բայց փաստ է, որ դա պարզապես անթույլատրելի է, այսինքն այլ երկրի տարածքում սեփական օդուժը օգտագործելը Հայաստանի դեմ չի կարող անպատիժ մնալ։ Բայց ինչպես նշել է Արծրուն Հովհաննիսյանը և մեր զինուժի մնացած պատասխանատուները, այս ամենին որոշակի ընթացակարգ է պետք, և բնականաբար իրենք հերքելու են, բայց մենք պետք է ապացուցենք։
- Վարչապետ Նիկոլ Փաշինյանը ռուսական լրատվամիջոցներին տված հարցազրույցում հայտարարել էր՝ Հայաստանը կապահովի իր անվտանգությունը ՀԱՊԿ-ի մասնակցությամբ կամ առանց դրա։ Ի՞նչ է սա նշանակում, և ինչպե՞ս եք ընդհանրապես գնահատում այս հայտարարությունը։
— Սա նշանակում է, որ մենք առաջին հերթին պետք է հույսներս դնենք մեզ վրա, ինչը և անում ենք, ու դա պատմության տված դասն է։ Եվ այդ դասը մենք լավ սերտել ենք։
Սոնա Գիշյան