Կոմանդոսը հանդիպել է գեներալների ու փորձագետների հետ. հայտարարությամբ հանդես կգան. «Հայկական ժամանակ»
ՔԱՂԱՔԱԿԱՆՈՒԹՅՈՒՆ«Ժամանակ» թերթը գրում է՝
Երեկվանից մեկնարկել են գեներալ-մայոր Արկադի Տեր-Թադեւոսյանի (Կոմանդոս) հանդիպումները պաշտոնաթող գեներալների եւ ռազմական փորձագետների հետ, որոնք Հայաստան են ժամանել Արկադի Տեր-Թադևոսյանի կոչով: Այդ հանդիպումների ժամանակ քննարկվել է Արցախի եւ Հայաստանի սահմանամերձ շրջանների իրավիճակը, որոշվել է ստեղծել աշխատանքային մարմին, որը կհամակարգի հետագա աշխատանքները:
Տեղեկությունը մեզ հետ զրույցում հաստատեց գեներալ-մայորը: «Հա, հա, հանդիպել ենք: Եղել է նման բան, բայց չեմ կարող մանրամասներ հայտնել: Հասկանալի է, որ հետաքրքիր է, բայց խնդրում եմ սպասեք»,- ասաց Տեր-Թադեւոսյանը: Նա հրաժարվեց հայտնել, թե ովքեր են մասնակցում հանդիպումներին, որտեղ է այն անցկացվում եւ առաջիկայում ինչ պլաններ ունեն: «Առաջիկայում հանդես կգանք հայտարարությամբ»,- ասաց Տեր-Թադեւոսյանը:
Ինչպես տեղեկացրել էինք՝ ապրիլի 10-ին Ստեփանակերտում գեներալ-մայոր Արկադի Տեր-Թադեւոսյանը հանդես էր եկել կոչով, որի նպատակն էր համախմբել բարձրաստիճան սպաներին ու փորձագետներին եւ նրանց միջոցով ռազմական-ուսումնական կենտրոններում համապատասխան գիտելիքներ փոխանցել բոլոր նրանց, ովքեր ցանկանում են զինվորագրվել հայոց բանակին:
Մեզ հետ զրույցում Տեր-Թադեւոսյանն ասել էր, որ համախմբվելու իր կոչին բազմաթիվ ազատամարտիկներ են արձագանքել, սակայն եկել է պահը, որ ընտրվեն նրանք, ովքեր կարող են կոնկրետ այս գործում ներդրում ունենալ:
«...կորստի, ափսոսանքի ու ոգեւորության օրերին մենք պետք է լինենք արժանի հայ զինվորին: Մենք իրավունք չունենք նրա գործած սխրանքը իզուր կորցնելու: Եվ որպեսզի լուծվեն հայ ժողովրդի առաջ ծառացած խնդիրները, թշնամին այլեւս երբեք չհանդգնի հարձակվել մեզ վրա, առավել եւս ոտք դնել մեր սուրբ հողին, մենք պետք է լինենք միասնական: Կոչ եմ անում աշխարհասփյուռ հայ գեներալների եւ ռազմական փորձագետներին՝ հավաքվել Երեւանում՝ համահայկական բանակի եւ հայության առաջ ծառացած խնդիրների լուծման ուղիները գտնելու նպատակով»,- մասնավորապես ասվում էր Կոմանդոսի կոչում: