Անհրաժեշտ էր համակարգային կոռուպցիայից զերծ պետական կառավարման համակարգ ստեղծել. Արման Մելիքյան
ՔԱՂԱՔԱԿԱՆՈՒԹՅՈՒՆՀՀ արտակարգ և լիազոր դեսպան, Արցախի ԱԳ նախկին նախարար Արման Մելիքյանն, անդրադառնալով Հայաստանի ներքաղաքական կյանքում տեղի ունեցող իրադարձություններին, օրերս ֆեյսբուքյան իր էջում կատարել էր հետևյալ գրառումը.
«Մեկ իշխանությունների ասածներն եմ լսում, մեկ 17+ ներկայացուցիչներինն ու տեսնում եմ, որ կողմերից և ոչ մեկն իրական անելիքի մասին առարկայական պատկերացում չունի այս պահին: Միմյանց՝ չարիք ու ազգի կործանիչ են հռչակում, բայց դրանով մեր ժողովրդին նորը ստեղծելու, այս արհավիրքը հաղթահարելու ոչ մի ճանապարհ էլ ցույց չեն տալիս: Մինչդեռ մենք արտակարգ իրավիճակում ենք, որից ելքերը ևս արտակարգ ռեժիմով գործելու կամք և ունակություն են պահանջում: Չեմ ուզում շատ մանրացնել, բայց նախ միմյանց պետք է հանդիպեն մեծ դրամն ու մասնագիտական որակները՝ ուղեղը: Միասին կարող են ընդհանուր նպատակը ձևակերպել, որից հետո մասնագետն իր գործն անի, դրամատերն էլ՝ այդ աշխատանքը ֆինանսավորի: Այդ երկուսի հանդիպումից որոշ ժամանակ անց էլ արդեն իմաստ կունենա մտածել իշխանական լծակները գործի դնելու, իշխանությունը վերցնելու մասին: Քանի դա չի եղել՝ ամեն ինչ վերածվում է գռեհիկ աթոռակռվի, երբ յուրաքանչյուրն ասում է՝ փրկիչը ես եմ, փրկվեք ինձանով»:
Ֆեյսբուքյան գրառումը գրավեց 1or.am-ի ուշադրությունը՝ մեծ դրամների և մասնագիտական որակների հանդիպման տեսլականի տեսանկյունից, առավել ևս, երբ խոսքը պետության պետականության նորովի կառուցման ու ամրապնդման մասին է: Եվ արդյո՞ք Ա. Մելիքյանի առաջարկած բանաձևի դեպքում պետությունը պատանդ չի դառնա մեծ դրամներ ունեցողների ձեռքին: Այս առիթով 1or.am-ը երկու հարց ուղղեց ԱՀ ԱԳ նախկին նախարարին:
- Պարոն Մելիքյան, սովորաբար դրամ վճարողն ինքն է երաժշտությունը պատվիրում: Ուստի չե՞ք կարծում, որ ժամանակն է, որ Համահայկական հիմնադրամի միջոցներով ազգային գաղափարախոսություն մշակվի և այն որպես ազգային պահանջ կյանքի կոչվի:
- Այս հարցում Համահայկական հիմնադրամը չի կարող հանդես գալ որպես պատվիրատու, քանի որ ինքն իր կարգավիճակով պատվեր կատարող հաստատություն է: Մեր առաջնային խնդիրն էլ ոչ թե համազգային գաղափարախոսության մշակումն է, այլ մեր պետականությունն ինքնուրույն ու կենսունակ դարձելն է՝ մեր քաղաքացին պետք է պաշտպանված լինի, իսկ երկիրը պետք է կայուն զարգացման համար անհրաժեշտ պայմաններն ունենա: Ներկա իրավիճակում խնդրի լուծումը հնարավոր է բացառապես մասնագիտական լուրջ թիմի աշխատանքի արդյունքում, ընդ որում, այդ աշխատանքը հենց մասնավոր կերպով պետք է ֆինանսվորվի:
- Կարծիք կա, որ անկախությունից ի վեր Հայաստանը միֆեր ձևավորելով է առաջ շարժվել, այդ իսկ պատճառով այսօր ունենք այն՝ ինչ ունենք: Ձեր կարծիքով ժամանակին ի՞նչ էր պետք անել, որ չի արվել, և ո՞րն է այսօրվա ամենահրատապ խնդիրը, որը օր առաջ պետք է իրականացնել:
- Անհրաժեշտ էր համակարգային կոռուպցիայից զերծ պետական կառավարման համակարգ ստեղծել, ուր որոշիչ կլիներ մասնագետի գիտահեն խոսքն, այլ ոչ թե քաղաքական առաջնորդների կուլիսային նախասիրություններն ու կամակորությունը: Իսկ ամենահրատապ խնդիրն էլ արդեն նախորդ պատասխանիս մեջ ներկայացրել եմ:
Արմինե Գրիգորյան