Ղրղզստանի և Ուզբեկստանի միջեւ հարաբերությունները սրվում են
ՄԻՋԱԶԳԱՅԻՆՂրղզստանը պահանջել է Ուզբեկստանից հանել սահմանային դիրքը չհամաձայնեցված հատվածից, ինչպես նաեւ բացատրություն տրամադրել դիրքը տեղադրելու կապակցությամբ: Այս մասին, ca-news-ի փոխանցմամբ, հայտնել է Ղրղզստանի սահմանապահ ծառայության նախագահ Ռայիմբերդի Դույշենբիեւը:
Վերջինիս խոսքով, Ուզբեկստանի այս քայլը խախտում է կողմերի միջեւ ձեռք բերված համաձայնությունները, որ ուզբեկական եւ ղրղզական սահմանապահները չպետք է մտնեն չհամաձայնեցված տարածքներ:
«Մուտքի բոլոր կետերը փակ են երկու կողմից, բացի միջազգային «Կըզըլ Կիյա» ավտոճանապարհային կետից: Մուտքի կետերը գործում են միայն երրորդ երկրների քաղաքացիների համար»,- մասնավորապես` ասել է ղրղզ զինվորականը:
Ուզբեկստանի քաղաքացիները, ովքեր ապրում են Սոխ անկլավային տարածքում, այնտեղ են հասնում «Կըզըլ Կիյա» ավտոճանապարհով:
Ավելի վաղ տեղեկություններ էին ստացվել, որ Ուզբեկստանի զինվորականները փակել էին Կերբեն-Ալա Բուկա ավտոճանապարհի 20-րդ կիլոմետրի հատվածը եւ երկու անցակետ դրել:
Ղրղզստանի նախագահը հանձնարարել է բարձրացնել սահմանապահ ծառայության մարտունակությունը:
Հիշեցնենք, որ Ղրղզստանը տարածքային վեճ ունի նաեւ Տաջիկստանի հետ:
Ավելացնենք, որ Ղրղզստանը, ինչպես եւ Հայաստանը, ՀԱՊԿ անդամ է: Ավելի վաղ նշել էինք, որ Ղրղզստանում ընդամենը երեք գեներալ կա: