Զելենսկու գրասենյակում հայտնել են ՌԴ-Ուկրաինա բանակցությունների մեկնարկի ժամը

Ռուսաստանի Դաշնության և Ուկրաինայի պատվիրակությունների միջև բանակցությունները կսկսվեն ժամը 17:00-ին (Երևանի ժամանակով 18:00-ին): Այս մասին հայտնել է Ուկրաինայի նախագահ Վլադիմիր Զելենսկու խորհրդականը, գրում է ՏԱՍՍ-ը։

Ռուսաստանի Դաշնության հետ բանակցություններում ուկրաինական պատվիրակության կազմում փոփոխություններ չկան:

Ռուս-ուկրաինական բանակցությունների երրորդ փուլը հնարավոր է տեղի ունենա մարտի 7-ին Բելառուսում: Պատվիրակությունները կրկին կհանդիպեն Բելովեժյան պուրակում, նրանք մտադիր են հանդիպումը սկսել ճաշից հետո: Ուկրաինան և Ռուսաստանը պայմանավորվել են շփվել փակ ռեժիմով:

Հիշեցնենք, որ փետրվարի 24-ի առավոտյան ՌԴ նախագահ Վլադիմիր Պուտինը հայտարարել էր Ուկրաինայի ապառազմականացման համար հատուկ ռազմական գործողություն սկսելու մասին։

Հեռուստաուղերձում նա ասել էր, որ հանգամանքները «մեզնից պահանջում են վճռական և անհապաղ գործողություններ, Դոնբասի ժողովրդական հանրապետությունները օգնության խնդրանքով դիմել են Ռուսաստանին»։

Ռուսաստանի ղեկավարի խոսքով, արյունահեղության ողջ պատասխանատվությունը կլինի Ուկրաինայում իշխող ռեժիմի խղճի վրա։ Նա ուկրաինացի զինվորականներին կոչ է արել չկատարել ուկրաինական իշխանությունների հանցավոր հրամանները, վայր դնել զենքերն ու գնալ տուն։