Մարիուպոլի ամբողջական ազատագրմանը շատ քիչ է մնացել. Կադիրով
ՄԻՋԱԶԳԱՅԻՆ
Չեչնիայի ղեկավար Ռամզան Կադիրովն ասել է, որ Մարիուպոլի ամբողջական ազատագրմանը շատ քիչ ժամանակ է մնացել:
«Ռուս զինծառայողները տունառտուն ազատագրում են Մարիուպոլը նացիստական բանդաներից, զինվորները գործում են վճռական, կոշտ և արագ։ Յուրաքանչյուր բարձրահարկ շենք ստուգվում է մինչև տանիք։ Բանդերայի ընդհատակից Մարիուպոլի ամբողջական ազատագրմանը շատ քիչ է մնացել»,- գրել է Կադիրովը Telegram-ի իր ալիքում։
Նա գրառումն ուղեկցել է Մարիուպոլի կադրերով, որտեղ չեչեն մարտիկները կռվում են, զննում են բազմահարկ շենքը և դրոշով գնում տանիք։
Հիշեցնենք, որ փետրվարի 24-ի առավոտյան ՌԴ նախագահ Վլադիմիր Պուտինը հայտարարել էր Ուկրաինայի ապառազմականացման համար հատուկ ռազմական գործողություն սկսելու մասին: Հեռուստաուղերձում նա ասել էր, որ հանգամանքները «մեզնից պահանջում են վճռական և անհապաղ գործողություններ, Դոնբասի ժողովրդական հանրապետությունները օգնության խնդրանքով դիմել են Ռուսաստանին»:
Ռուսաստանի ղեկավարի խոսքով, արյունահեղության ողջ պատասխանատվությունը կլինի Ուկրաինայում իշխող ռեժիմի խղճի վրա։ Նա ուկրաինացի զինվորականներին կոչ է արել չկատարել ուկրաինական իշխանությունների հանցավոր հրամանները, վայր դնել զենքերն ու գնալ տուն։
Ի պատասխան Արևմուտքը սահմանել է նոր հակառուսական պատժամիջոցներ: Մասնավորապես, դրա ներքո են հայտնվել մի քանի խոշորագույն բանկեր, ներառյալ «Սբերբանկ»-ը և ՎՏԲ-ն: Եվրամիությունը, ԱՄՆ-ն, Կանադան և մի շարք այլ երկրներ երկինքը փակել են Ռուսաստանի ինքնաթիռների համար: Մի շարք պետական ընկերությունների համար դժվարացել են օտարերկրյա կապիտալի ներգրավման հնարավորությունները: Պատժամիջոցներ են սահմանվել բարձրտեխնոլոգիական ապրանքներ Ռուսաստան մատակարարելու վրա:
