Առաջիկա օրերին Կիևի մերձակայքում թեժ մարտեր են ծավալվելու. Մեծ Բրիտանիայի ՊՆ հետախուզություն

Կիևի մերձակայքում թեժ մարտեր են ծավալվելու առաջիկա օրերին։ Այս մասին ասվում է Մեծ Բրիտանիայի պաշտպանության նախարարության վերջին հետախուզական ամփոփագրում: Նշվում է, որ Ռուսաստանի Դաշնության զինվորականները շարունակում են դիրքեր պահպանել Կիևից դեպի արևելք և արևմուտք՝ որոշ ստորաբաժանումների դուրսբերման ֆոնին։

Ինչպես նշվում է բրիտանական հետախուզական ամփոփագրում, չնայած Ռուսաստանի հայտարարություններին Չերնիգովի շուրջ ռազմական ակտիվությունը նվազեցնելու մտադրության մասին, ռուսական հրետանային ռմբակոծությունները և հրթիռային հարձակումները շարունակվում են։

Ծանր մարտերը շարունակվում են նաև Մարիուպոլում, ուկրաինացի զինվորականները դեռ վերահսկում են քաղաքի կենտրոնը:

Հիշեցնենք, որ փետրվարի 24-ի առավոտյան ՌԴ նախագահ Վլադիմիր Պուտինը հայտարարել էր Ուկրաինայի ապառազմականացման համար հատուկ ռազմական գործողություն սկսելու մասին:

Հեռուստաուղերձում նա ասել էր, որ հանգամանքները «մեզնից պահանջում են վճռական և անհապաղ գործողություններ, Դոնբասի ժողովրդական հանրապետությունները օգնության խնդրանքով դիմել են Ռուսաստանին»:

Ռուսաստանի ղեկավարի խոսքով, արյունահեղության ողջ պատասխանատվությունը կլինի Ուկրաինայում իշխող ռեժիմի խղճի վրա։ Նա ուկրաինացի զինվորականներին կոչ է արել չկատարել ուկրաինական իշխանությունների հանցավոր հրամանները, վայր դնել զենքերն ու գնալ տուն։

Ի պատասխան Արևմուտքը սահմանել է նոր հակառուսական պատժամիջոցներ: Մասնավորապես, դրա ներքո են հայտնվել մի քանի խոշորագույն բանկեր, ներառյալ «Սբերբանկ»-ը և ՎՏԲ-ն: Եվրամիությունը, ԱՄՆ-ն, Կանադան և մի շարք այլ երկրներ երկինքը փակել են Ռուսաստանի ինքնաթիռների համար: Մի շարք պետական ընկերությունների համար դժվարացել են օտարերկրյա կապիտալի ներգրավման հնարավորությունները: Պատժամիջոցներ են սահմանվել բարձրտեխնոլոգիական ապրանքներ Ռուսաստան մատակարարելու վրա: