ՌԴ ՊՆ-ն հայտնել է ուկրաինական զինամթերքի 5 պահեստի ոչնչացման մասին
ՄԻՋԱԶԳԱՅԻՆ
Ռուսաստանի Դաշնության զինված ուժերը բարձր ճշգրտության օդային զինատեսակներով ոչնչացրել են Ուկրաինայի զինված ուժերի վեց օբյեկտ, այդ թվում՝ զինամթերքի հինգ պահեստ։ Այս մասին ուրբաթ լրագրողներին ասել է ՌԴ պաշտպանության նախարարության պաշտոնական ներկայացուցիչ Իգոր Կոնաշենկովը։
ՏԱՍՍ-ի փոխանցմամբ, նա հավելել է, որ Ռուսաստանի օդատիեզերական ուժերի հակաօդային պաշտպանությունը վերջին մեկ օրում խոցել է ուկրաինական Մի-8 ուղղաթիռ և ութ անօդաչու թռչող սարք։
Հիշեցնենք, որ փետրվարի 24-ի առավոտյան ՌԴ նախագահ Վլադիմիր Պուտինը հայտարարել էր Ուկրաինայի ապառազմականացման համար հատուկ ռազմական գործողություն սկսելու մասին:
Հեռուստաուղերձում նա ասել էր, որ հանգամանքները «մեզնից պահանջում են վճռական և անհապաղ գործողություններ, Դոնբասի ժողովրդական հանրապետությունները օգնության խնդրանքով դիմել են Ռուսաստանին»:
Ռուսաստանի ղեկավարի խոսքով, արյունահեղության ողջ պատասխանատվությունը կլինի Ուկրաինայում իշխող ռեժիմի խղճի վրա։ Նա ուկրաինացի զինվորականներին կոչ է արել չկատարել ուկրաինական իշխանությունների հանցավոր հրամանները, վայր դնել զենքերն ու գնալ տուն։
Ի պատասխան Արևմուտքը սահմանել է նոր հակառուսական պատժամիջոցներ: Մասնավորապես, դրա ներքո են հայտնվել մի քանի խոշորագույն բանկեր, ներառյալ «Սբերբանկ»-ը և ՎՏԲ-ն: Եվրամիությունը, ԱՄՆ-ն, Կանադան և մի շարք այլ երկրներ երկինքը փակել են Ռուսաստանի ինքնաթիռների համար: Մի շարք պետական ընկերությունների համար դժվարացել են օտարերկրյա կապիտալի ներգրավման հնարավորությունները: Պատժամիջոցներ են սահմանվել բարձրտեխնոլոգիական ապրանքներ Ռուսաստան մատակարարելու վրա:
