Վան Դեյք. Գործնականում անիրագործելի է Անգլիայում 4 տիտղոս նվաճելը
ՍՊՈՐՏ
Անգլիական «Լիվերպուլի» հոլանդացի պաշտպան Վիրջիլ վան Դեյքը խոսել է այս մրցաշրջանում 4 տիտղոս նվաճելու հնարավորությունների մասին:
Գերմանացի Յուրգեն Կլոպի գլխավորած թիմը նվաճել է Անգլիական լիգայի գավաթը եւ շարունակում է պայքարը Չեմպիոնների լիգայում, Անգլիայի գավաթի խաղարկությունում, իսկ Պրեմիեր լիգայում 1 միավոր է հետ առաջատար «Մանչեսթեր Սիթիից»:
«Ոչ մի թիմ Անգլիայում մեկ մրցաշրջանում 4 տիտղոս դեռ չի նվաճել: Պատճառն այն է, որ դա գործնականում անիրագործելի է:
4 կամ 3 տիտղոս նվաճելու մասին բոլոր խոսակցությունները դրսից են եւ միայն լրացուցիչ ճնշում կարող են լինել մեր թիմի համար:
Բոլորն էլ երազում են հաղթել բոլոր մրցաշարերում, որոնց մասնակցում են: Վերջում կտեսնենք, թե ինչի հասանք: Ամեն ինչ էլ կարող է պատահել»,- Վան Դեյքի խոսքը մեջբերում է BBC-ն:
Հաջորդ հանդիպումը «Լիվերպուլը» կանցկացնի ապրիլի 19-ին՝ Պրեմիեր լիգայի 30-րդ տուրից տեղափոխված խաղում ընդունելով «Մանչեսթեր Յունայթեդին»:
