Արցախի նախագահը և «Ազատ Հայրենիք»-ի ակտիվը քննարկել են երկրի անվտանգությանը վերաբերող հարցեր

Արցախի Հանրապետության նախագահ Արայիկ Հարությունյանը մայիսի 19-ին այցելել է «Ազատ Հայրենիք» կուսակցության գրասենյակ և հանդիպել կուսակցական ակտիվի հետ:

Այս մասին տեղեկացնում են Արցախի նախագահի աշխատակազմի տեղեկատվության գլխավոր վարչությունից։

Քննարկվել է երկրի անվտանգությանը, սոցիալ-տնտեսական իրավիճակին, տարածաշրջանային ու աշխարհաքաղաքական զարգացումներին և այդ համատեքստում Արցախի Հանրապետության ապագային առնչվող հարցերի լայն շրջանակ։ Հանրապետության նախագահը պատասխանել է նաև ներկաներին հուզող հարցերին։

Երկրի ղեկավարը կարևորել է կուսակցությունների հետ նման ձևաչափով հանդիպումները, ընդգծել, որ առկա մարտահրավերներին հաջողությամբ դիմագրավելու համար անհրաժեշտ է բոլոր կարող ուժերի ջանքերի համախմբում:

Հանդիպմանը ներկա էին ԱՀ ԱԺ նախագահ Արթուր Թովմասյանը և «Ազատ Հայրենիք-ՔՄԴ» խորհրդարանական խմբակցության ղեկավար Արթուր Հարությունյանը։