Պուտինը շոշափելի առաջընթաց է գրանցում Ուկրաինայում. Բորիս Ջոնսոն

Մեծ Բրիտանիայի վարչապետ Բորիս Ջոնսոնն այսօր ասել է, որ Ռուսաստանի նախագահ Վլադիմիր Պուտինի բանակն Ուկրաինայի արևելյան շրջանում առաջխաղացում է արձանագրում:

«Կարծես թե, Պուտինն իր և ռուսական զորքի համար ծանր գնով, այնուամենայնիվ շարունակում է նորանոր տարածքներ յուրացնել Դոնբասում: Նա շարունակում է թեպետ դանդաղ, բայց շոշափելի առաջընթաց  գրանցել, ուստի, ծայրաստիճան անհրաժեշտ է, որ մենք շարունակենք աջակցել Ուկրաինայի բանակին»,- ասել է Ջոնսոնը:

Մեծ Բրիտանիայի վարչապետի համոզմամբ, Ուկրաինայի բանակին անհրաժեշտ են նոր զինատեսակներ, այդ թվում՝ համազարկային կրակի նոր ռեակտիվ հրթիռային համակարգեր:

«Պատերազմն ավարտելու մեկ այլ տարբերակն այն է, որ Պուտինն ընդունի, թե Ուկրաինայի դենացիֆիկացումն ավարտվել է և այդպես կարողանա արժանապատվորեն դուրս գալ Ուկրաինայից»,- ասել է Ջոնսոնը և անմիջապես ընդգծել, թե բնավ չի կիսում ռուսական կողմի ենթադրությունն այն մասին, որ Ուկրաինայում կան նացիստներ:

Բորիս Ջոնսոնի համոզմամբ, բոլոր դեպքերում Պուտինն ունի «քաղաքական առումով մանևրելու և պատերազմին վերջ տալու հնարավորություններ»: