«Դիմադրություն» շարժման շատ գործընթացներ թերի են, բայց Չալաբյանի մտահոգությունները տեղին են. Հրանտ Խաչատրյան

«ԱրԱր» հիմնադրամի համահիմնադիր Ավետիք Չալաբյանը կալանավայրից բացառիկ հարցազրույց է տվել «Առավոտին», որտեղ կարծիք է հայտնել, որ Արևմուտքը Հայաստանը դիտարկում է իբրև ՌԴ-ի դեմ երկրորդ ճակատի հնարավորություն.

«Այս իմաստով, Հայաստանում դեռևս գործող իշխանությունը վտանգավոր խաղ է տանում, որի հետևանքը կարող է լինել ոչ միայն Արցախի և Սյունիքի կորուստը, այլև Հայաստանի վերածվելը աշխարհաքաղաքական բախման թատերաբեմի՝ Սիրիայի և Ուկրաինայի օրինակով։ «Դիմադրության» շարժումը դրան խանգարում է, ուստի եթե դիտարկենք այն այդպիսի լայն համատեքստում, ապա արդեն տեսանելի է նրա դրական ազդեցությունը՝ հստակորեն ընդգծելով, որ Հայաստանի բնակչության ճնշող մեծամասնությունը դեմ է Արցախի հանձնմանը, այն կաշկանդում է գործող իշխանությանը, և թույլ չի տալիս նրան գնալ աշխարհաքաղաքական արկածախնդրության՝ բոլորիս համար աղետալի հետևանքներով»։

Հայաստանի Գերագույն խորհրդի, Հայաստանի Ազգային ժողովի երկրորդ և երրորդ գումարումների պատգամավոր, քաղաքական գործիչ Հրանտ Խաչատրյանը 1or.am-ի հետ զրույցում նշում է, որ ինչ-որ առումով համաձայն է Չալաբյանի հետ.

«Թուրքիայի առկա և աճող գործոնի վերաբերյալ անպայման հայությունը պետք է որոշակի դիրքորոշում ցույց տա՝ անկախ «Դիմադրություն» շարժման հետ կապված մյուս հանգամանքներից: Փառք Աստծո, իրենք կարողացան դա որոշ չափով անել։ Իհարկե, չստացվեց այն ծավալը, որով պետք է Հայաստանը բարձրաձայներ աշխարհի առաջ, որ թուրքական գործոնը ոչ միայն Հայաստանի վրա է ազդեցիկ և կործանարար, այլ Թուրքիայի ձեռքը նաև հասնում է, թե՛ Եվրոպային, թե՛ Սկանդինավիային, օրինակ Թուրքիան հիմա միջամտում է Դանիայի և Ֆինլանդիայի գործընթացին։ Ես կողմ եմ, որ Դանիան ու Ֆինլանդիան չմտնեն ՆԱՏՕ, քանի որ նրանք ինչպես չեզոք եղել են, այնպես չեզոք էլ պետք է զարգանան, բայց որ Թուրքիան պետք է միջամտի իր շահերից ելնելով, իհարկե, դա զայրացնում է ոչ միայն եվրոպացիներին, այլ նաև կարծեմ Բայդենը որոշակի վերաբերմունք է ցույց տվել Ամերիկայի կողմից։

Ես, իհարկե, շատերի հետ կարող եմ համաձայնել «Դիմադրություն» շարժման գործընթացների թերի լինելու առումով, բայց որ իրենք կարողացան այդքան բան կազմակերպել, այստեղ կարելի է իշխանություններին մեղադրել, որ իրենք չեն հասկանում, որ թեկուզ և համոզված են՝ ճիշտ քաղաքականություն են վարում, բայց իրենք պետք է հասկանան, որ գոնե վերամիավորված Հայաստանի անունից պետք է այդ ըմբոստությունը լինի և բարձրաձայնվի աշխարհի առաջ, և դա արեց դիմադրություն շարժումը։ Այս առումով, իհարկե, Չալաբյանի մտահոգությունները տեղին են»:

Մարիամ Նալբանդյան