Ավետիք Չալաբյանի խափանման միջոցը մնաց անփոփոխ․ նա կշարունակի կալանավորված մնալ

Երևանի ընդհանուր իրավասության դատարանն այսօր մերժեց «Համախմբում» շարժման անդամ Ավետիք Չալաբյանի նկատմամբ ընտրված խափանման միջոց կալանավորումը փոխարինելը թույլատրելի ճանաչելու վերաբերյալ միջնորդությունը:

Դատարանի դահլիճում Ավետիք Չալաբյանը լրագրողների հետ ճեպազրույցում նշեց. «Տեղի ունեցող բոլոր իրադարձությունները ցույց են տալիս, որ այս գործը շինծու է: Իմ կալանքն ընդամենը պատժելու միջոց է և բացարձակ քաղաքական դրդապատճառներով, մի պահ նույնիսկ մի կասկածեք դրանում»:

Ավետիք Չալաբյանի փաստաբան Արթուր Հարությունյանն էլ նշեց, որ գործը քաղաքական հետապնդում է, և այն արարքը, որը վերագրվում է Ավետիք Չալաբյանին, իրականության հետ որևէ աղերս չունի: Նա նշեց նաև, որ նոր Քրեական օրենսգրքով այս պահին նման մեղադրանք պարզապես գոյություն չունի: