Կուրսկում 2 ուկրաինական ԱԹՍ է խոցվել. զոհեր եւ վիրավորներ չկան
ՄԻՋԱԶԳԱՅԻՆ
Ռուսաստանի Դաշնության Կուրսկի շրջանի նահանգապետ Ռոման Ստարովոյտը հայտարարել է, որ ռուսական հակաօդային պաշտպանությունը Կուրսկի շրջանի երկնքում երկու ուկրաինական «Ստրիժ» անօդաչու թռչող սարք է խոցել։
«Այս գիշեր Կուրսկին մոտենալիս մեր հակաօդային պաշտպանությունը խոցել է երկու ուկրաինական «Ստրիժ» անօդաչու թռչող սարք։ Զինվորականների գրագետ գործողությունների շնորհիվ զոհեր եւ վիրավորներ չկան», - իր տելեգրամյան ալիքում ասել է նահանգապետը:
Նա ցավով նշել է, որ Բելգորոդում իրավիճակն այլ է։ Հարձակման հետեւանքով բնակիչների շրջանում կան զոհեր եւ վիրավորներ, ավերվել են խաղաղ բնակիչների տները։
«Իմ անունից, Կուրսկի ողջ ժողովրդի անունից իմ ցավակցությունն եմ հայտնում զոհվածների ընտանիքներին եւ ընկերներին։ Կուրսկի մարզը ձեզ հետ սգում է»,- գրել է Ստարովոյտը:
