Հակառուսական նոր սադրանք փաշինյանական իշխանությունից

ԱՄՆ ԿՀՎ տնօրենի այցից հետո Ռուսաստանի արտաքին հետախուզության ծառայության ղեկավար Սերգեյ Նարիշկինի այցը Երևան և փակ հանդիպումներում ներկայացրած եզրահանգումները, թերևս, մտահոգել են Նիկոլ Փաշինյանին ու նրա վարչախմբին։

Անվտանգության խորհրդի քարտուղար, սորոսական անցյալով և հակառուսական տրամադրություններով հայտնի Արմեն Գրիգորյանն է շտապել հերթական սադրանքն անելու, ռուսական կողմի հասցեին տողատակներով մեղադրանքներ հղելու։

«Արմենպրեսս»-ին Գրիգորյանը հարցազրույց է տվել, անդրադարձել Փառուխի դեպքերին։ ԱԽ քարտուղարը հայտարարել է, թե Արցախի Հանրապետությունում Հայաստանից զորակոչված ժամկետային զինծառայողներ չեն լինի, սակայն հավելել է, որ Լեռնային Ղարաբաղում զորակոչիկները կշարունակեն զորակոչվել պաշտպանության բանակում ծառայելու:

«Պատերազմի ընթացքում ՀՀ ԶՈւ մի շարք ստորաբաժանումներ օգնության են հասել ԼՂ Պաշտպանության բանակին: Հրադադարի հաստատումից և ԼՂ-ում Ռուսաստանի Դաշնության խաղաղապահ կոնտինգենտի տեղակայումից հետո ՀՀ ԶՈւ ստորաբաժանումների դուրսբերումը ԼՂ-ից տրամաբանական է»,- ասել է նա և հավելել, թե Լեռնային Ղարաբաղում ՌԴ խաղաղապահ ուժերի տեղակայումը պիտի անվտանգության երաշխիք լինի:

«Բայց Փառուխի դեպքերը ցույց տվեցին, որ այդպես չէ» իբր տրված հարցին էլ Արմեն Գրիգորյանը պատասխանել է, որ Փառուխի դեպքերը 2020 թվականի նոյեմբերի 9-ի եռակողմ հայտարարության և կիրառելի միջազգային իրավունքի կոպիտ խախտում են:

«Ադրբեջանի ԶՈւ ստորաբաժանումները ներխուժեցին Լեռնային Ղարաբաղում ՌԴ խաղաղապահ ուժերի պատասխանատվության գոտի: Ռուսաստանի Դաշնությունը մեզ հավաստիացրել է, որ ներխուժած ադրբեջանական ուժերը պետք է դուրս գան այնտեղից, և մենք հույս ունենք, որ ՌԴ խաղաղապահ ուժերը կապահովեն ապօրինի ներխուժած ադրբեջանական ստորաբաժանումների դուրսբերումը Լեռնային Ղարաբաղում ՌԴ խաղաղապահ ուժերի պատասխանատվության գոտուց:

ՌԴ խաղաղապահ ուժերի առկայությունն ինքնին վկայում է ԼՂ բնակչության համար իրական գոյաբանական վտանգի առկայության հանգամանքի ընդունում ՌԴ կողմից, և խաղաղապահ ուժերն առանցքային նշանակություն ունեն ԼՂ հայության անվտանգության երաշխավորման գործում»,- ասել է նա՝ սլաքներն ուղղելով ՌԴ զորախմբի ուղղությամբ։

Մի կողմ թողնենք այն հանգամանքը, որ ԱԽ քարտուղարն անթաքույց արհամարհանքով է խոսում իր ծննդավայր Արցախի մասին, ասես մի երրորդ պետություն էր, որին իրենք բարեհաճել են օգնել։

Այս իշխանության ներկայացուցիչները վաղուց են ապացուցել, որ օրգանական որևէ կապ չունեն Արցախի հետ։ Փաստն այն է, որ նրանք Արցախի բոլոր խնդիրները թողել են ՌԴ ուսերին և այժմ փորձում են մի կողմ քաշվել, պատասխանատվությունը բարդել Ռուսաստանի վրա։

Խաչատուր Մանուկյան