Հայաստանում պետական կառավարման լուրջ ճգնաժամ է

Հարյուրավոր փրկարարներ, կամավորներ վերջին երկու օրերին անձնուրաց պայքարում են «Սուրմալու» առևտրի կենտրոնի հրդեհի և պայթյունի հետևանքների դեմ։ Ծայրաստիճան շոգին և թունավոր օդի պայմաններում փորձում են հեռացնել փլատակները, դուրս բերել զոհվածների դիերը կամ ենթադրյալ կենդանի մնացածներին։

«Սուրմալու»-ում ստեղծված իրավիճակը ևս մեկ անգամ բացահայտում է Հայաստանի պետական համակարգի բոլոր թերությունները։ Ազգային ժողովի ընդդիմադիր պատգամավոր Տիգրան Աբրահամյանը նշում է, որ առաջին խնդիրը, որը պետք է իշխանությունը լուծեր, համակարգող շտաբի ստեղծումն է, պետք է ընդգրկվեն նույնիսկ նվազագույն չափով դեպքի հետ առնչություն ունեցողները։

«Այս ողբերգությունը և դրա հետևանքների վերացման ուղղությամբ աշխատանքները շատ դեպքերում հիշեցնում են 44-օրյա պատերազմը, կազմակերպչական կառավարման և մարդկային ռեսուրսների ներգրավման առումով։ Չնայած առանձին ծառայությունների, հրշեջների, փրկարարների, առանձին ոստիկանների անձնազոհ ջանքերի, պետք է արձանագրել, որ ամենամեծ խնդիրը իրավիճակը ճիշտ ախտորոշելն ու անհրաժեշտ ռեսուրսների ներգրավումն է»,- նշում է պատգամավորը։

Արտակարգ իրավիճակների նախարարությունը, փրկարարները փորձում են աշխատել հնարավորինս մեծ նվիրումով, սակայն հարկ է նշել, որ խնդիրները միայն այս նախարարությունում չեն։ Պետական կառավարման համակարգն ընդհանուր առմամբ լուրջ, լոգիստիկ պրոբլեմներ ունի, որոնք անհնար է լուծել Նիկոլ Փաշինյանի իշխանության օրոք։

Այդ լոգիստիկ խնդիրների մեջ մտնում են ոչ միայն կազմակերպչական հարցերը, որոնողա-փրկարարական գործողությունները արդյունավետ իրականացնելը, այդ թվում նաև քարոզչական խնդիրները, երբ պետական համակարգը չի կարողանում դիմագրավել արտաքին և ներքին դիվերսիաների, սաբոտաժի, ինչպես նաև որոշակի խուճապային տրամադրություններին։

Հայաստանում պետական կառավարման լուրջ ճգնաժամ է, և այդ ճգնաժամը հարկ է օր առաջ կարգավորել, այլապես հաջորդ նման հնարավոր արտակարգ իրավիճակը կարող է ընդհանրապես կոլապսի ենթարկել պետական համակարգը և միաժամանակ Հայաստանի Հանրապետությունը։ Ահա սա է ամենակարևոր խնդիրը, որ այսօր կանգնած է Հայաստանի առջև։ 

Հրանտ Թադևոսյան