ՆԱՏՕ-ի անդամ Թուրքիան ռազմական օբյեկտ կկառուցի ՀԱՊԿ անդամ Ղրղզստանում
ՄԻՋԱԶԳԱՅԻՆԹուրքիայի իշխանությունները մտադիր են ռազմական ուսումնարան կառուցել Ղրղզստանում` նախատեսված սպաների համար: Նախագծի արժեք գնահատվում է 30 միլիոն ԱՄՆ դոլար:
«Շինարարությունը նախատեսվում է իրականացնել Բիշքեքի մոտ, այդ նպատակով հատկացվել է 20 հեկտար հող: Դա լինելու է ամենաժամանակակից ռազմական ուսումնարանը Ասիայում` թուրքական ուսումնարանների օրինակով: Այնտեղ պատրաստելու են Ղրղզստանի սպաներին»,- մասնավորապես` ղրղզական Akipress գործակալությանն է հայտնել այդ երկրում Թուրքիայի ռազմական կցորդ Հեքխան Փեքերը:
Նշվում է նաեւ, որ ուսումնարանը նախատեսված է լինելու 600 կուրսանտների համար: Փեքերը ավելացրել է նաեւ, որ Թուրքիան օգնում է Ղրղզստանին նաեւ այլ ոլորտներում, օրինակ` ռազմական բժշկության, որպեսզի «Ղրղստանի զինված ուժերը ժամանակակից բանակ դառնան»:
Ավելացնենք, որ Ղրղզստանը ՀԱՊԿ անդամ է, թուրքիան` ՆԱՏՕ-ի:
Ավելի վաղ հայտնել էինք, որ Ղրղզստանի եւ Ուզբեկստանի միջեւ հարաբերությունները սրվում են: