Վարկաբեկել հայ զինվորի կերպարը․ Փաշինյանի մարտավարությունը ձախողվում է

Արցախյան 44-օրյա պատերազմից հետո գործող վարչախումբը՝ Նիկոլ Փաշինյանի գլխավորությամբ, քարոզչական կեղտոտ հնարքների է դիմում ընդամենը մեկ նպատակով՝ պարտության ամբողջ մեղքը հայ զինվորականության, հայկական բանակի վրա բարդելու համար։ Այդ առումով, օգտագործելով իր քարոզչական հնարավորություններն ու ռեսուրսները, իրավապահ մարմինների խամաճիկ վիճակը, Փաշինյանն անընդհատ փորձում է հասարակության մեջ սերմանել, թե հայ զինվորականը, գեներալն ու սերժանտը, կամավորականն ու սպան դավաճաններ կամ վախկոտներ են։

Տակավին օրեր առաջ համացանցում տարածված տեսանյութը, թե ինչպես է հայ կամավորական Տարոն Անդրեասյանը միայնակ կանգնեցնում ադրբեջանական շարասյունը, հրաժարվում հանձնվել թշնամուն և, անօրինակ հերոսություն դրսևորելով նռնակով և ինքնաձիգով մինչև վերջ պայքարում, եկավ կրկին ապացուցելու ժողովրդին, որ հայ զինվորականը բնավ էլ վախկոտ ու դավաճան չէ, ինչպես փորձում են ներկայացնել Նիկոլ Փաշինյանն ու նրա սպասարկուները։

Հատկանշական է, որ գործող վարչախմբի ներկայացուցիչները առանձնապես ջանք չգործադրեցին ո՛չ համացանցում, ո՛չ մամուլում դրվատելու հերոսության այդ դրվագը, ընդհակառակը, փորձեցին մոռացության տալ։ Իսկ երեկ էլ թե՛ Արցախի քննչական կոմիտեն, թե՛ Հայաստանի ԱԱԾ-ն պաշտոնական հաղորդագրություններ տարածեցին դավաճանությունների վերաբերյալ։

Մի դեպքում նշվում էր, թե զինվորականը չի կատարել իր պարտականությունները ամսական 500 դոլար վարձատրության դիմաց, իր ղեկավարած մարտական ռեակտիվ համակարգի դիտավորությանբ կատարել է ոչ նպատակային կրակային արձակումներ, չի խոցել հակառակորդի կրակային նշանակետերը, խափանել մարտական առաջադրանքը։

Արցախի քննչական կոմիտեն էլ տեղեկություն էր տարածել, թե գումարի և այֆոն հեռախոսի դիմաց փոխանցել են ադրբեջանցիներին պետական գաղտնիք հանդիսացող հույժ գաղտնի տեղեկություններ։ Սա հայկական բանակի դեմ քարոզչության հերթական դրսևորումն է։

Տարոն Անդրեասյանի հերոսության տարածումից անհանգստացած իշխանությունները կրկին փորձում են հանրությանը համոզել, թե հայ զինվորականը դավաճան է և մի քանի հարյուր դոլարի դիմաց վաճառում է պետական գաղտնիքները։

Միակ ելքը այս իրավիճակում, հայկական զինված ուժերի հեղինակությունը հանրության մեջ բարձրացնելն է, իսկ դրա համար հարկավոր է հեռացնել դավաճան իշխանությանը։ Ահա սա է իսկական դավաճանությունը, երբ հասարակության գիտակցության մեջ փորձում են սերմանել ամենավատ և ամենակեղտոտ թեզերը՝ վարկաբեկելով մինչև վերջ հայ զինվորին։

Ավետ Միքայելյան