Էրդողանն ու Լապիդը կհանդիպեն Նյու Յորքում ՄԱԿ Գլխավոր ասամբլեայի շրջանակներում

Իսրայելի վարչապետ Յաիր Լապիդը եւ Թուրքիայի նախագահ Թայիփ Էրդողանը կհանդիպեն Նյու Յորքում ՄԱԿ Գլխավոր ասամբլեայի ժամանակ, հայտնում է Reuters-ը՝ հղում անելով Լապիդի մամուլի ծառայությանը։

Լապիդի գրասենյակից հայտնել են, որ Նյու Յորքում գտնվելու ընթացքում նա կհանդիպի նաեւ Հունաստանի վարչապետի հետ։

«Հանդիպումը եւս մեկ կարեւոր իրադարձություն է այն երկրների համար, որոնք աշխատում են վաղուց խզված կապերը վերականգնելու ուղղությամբ»,- նշում է ԶԼՄ-ն:

Երկու կառավարություններն էլ 2018 թվականին արտաքսել են դեսպաններին եւ հաճախակի տհաճ խոսքեր են փոխանակել իսրայելա-պաղեստինյան հակամարտության մասին: Թուրքիան եւ Իսրայելը անցյալ ամիս հայտարարել են, որ նորից դեսպաններ կնշանակեն։

Մարտին Իսրայելի նախագահը, ում պաշտոնը հիմնականում արարողակարգային է, Էրդողանի հրավերով այցելել է Թուրքիա՝ 2008 թվականից ի վեր Իսրայելի ամենաբարձր այցը։ Երկու ամիս անց Թուրքիայի արտաքին գործերի նախարարն այցելել է Իսրայել, եւ տարածաշրջանային տերությունները հայտարարել են, որ հույս ունեն ընդլայնել տնտեսական կապերը: