Արժույթի միջազգային հիմնադրամը եւ Համաշխարհային բանկը նախազգուշացրել են գլոբալ ռեցեսիայի աճող ռիսկի մասին

Արժույթի միջազգային հիմնադրամը եւ Համաշխարհային բանկը նախազգուշացրել են գլոբալ ռեցեսիայի աճող ռիսկի մասին, քանի որ գնաճի արագացումը կենտրոնական բանկերին ստիպում է բարձրացնել տոկոսադրույքները՝ սահմանափակելով տնտեսական աճը, գրում է Bloomberg-ը։

Փոխառությունների ավելի բարձր արժեքն «իրոք սկսում է կծել», ասել է ԱՄՀ գործադիր տնօրեն Քրիստալինա Գեորգիեւան՝ ելույթ ունենալով Համաշխարհային բանկի նախագահ Դեւիդ Մալպասի հետ:

ԱՄՀ-ի հաշվարկներով՝ համաշխարհային տնտեսության մոտ մեկ երրորդը առնվազն երկու եռամսյակ անընդմեջ կկրճատվի այս եւ հաջորդ տարի, իսկ արտադրության կորուստները մինչեւ 2026 թվականը 4 տրիլիոն դոլար կկազմեն:

Միեւնույն ժամանակ, քաղաքական գործիչները չեն կարող թույլ տալ, որ գնաճը «փախչող գնացք» դառնա, ասել է Գեորգիեւան։

Մալպասը նախազգուշացրել է, որ հաջորդ տարի համաշխարհային անկման «իրական վտանգ» կա, եւ ուժեղ դոլարը թուլացնում է զարգացող երկրների արժույթները՝ նրանց պարտքը հասցնելով «ծանրաբեռնված» մակարդակի: