Արցախի հարցը մանիպուլացնելով՝ Փաշինյանը փորձում է խփել ընդդիմությանը

Փաշինյանական վարչախումբը Արցախի շուրջ ստեղծված իրավիճակը փորձում է օգտագործել ընդդիմադիրների դեմ ներքաղաքական պայքարի, ինչպես նաև ընդդիմադիր խմբակցություններին վարկաբեկելու համար։

Երեկ Կառավարության հետ հարց ու պատասխանի ժամանակ Նիկոլ Փաշինյանը հայտարարել է, թե Հայաստանի Կառավարություն շատ վաղուց՝ դեռևս 2021 թվականի հունվարից, ընդունել է Լեռնային Ղարաբաղի կարգավիճակը հետաձգելու մասին ռուսական կողմի մասին առաջարկները, բայց դրա մասին չի խոսել զուտ կոռեկտությունից ելնելով։

«Ընդդիմության այն քննադատությանը կուզեի անդրադառնալ, թե Լեռնային Ղարաբաղի հիմնախնդրի առումով մեր արձանագրումները, դիրքորոշումները կոնկրետ չեն և խուսափողական են։ Եթե ես այս գնահատական կարող էի հասկանալ մեկ, մեկուկես ամիս առաջ, այսօր չեմ կարող դա ընդունել և ընկալել, որովհետև կարծում եմ, որ ՌԴ նախագահի Վալդայի ակումբում արված հայտարարությունը շատ կարևոր էր ու էական, որպեսզի մենք մի շարք հարցեր պարզաբանենք և արձանագրենք, որ առնվազն Հայաստանի քաղաքական դաշտում այդ մոտեցումների առումով համարյա կոնսեսուսային իրավիճակ է»,- հայտարարել է Փաշինյանը։

Եվ դիմելով ընդդիմությանը՝ հայտարարել. «Եթե ընդդիմությունը հիմա այլ կարծիքի է և համարում է, որ Հայաստանը պետք է մերժի Ռուսաստանի առաջարկները, ճիշտ կլինի, որ նրանք այդ մասին բարձրաձայն հայտարարեն»։

Հիշեցնենք՝ տևական ժամանակ Նիկոլ Փաշինյանն ընդհանրապես չէր հայտնում, թե առաջարկված տարբերակներից որին է կողմ՝ ռուսական առաջարկի՞ն, որը հետաձգում է Լեռնային Ղարաբաղի կարգավիճակը, թե՞ արևմտյան առաջարկներին, որ հակամարտության համապարփակ կարգավորում է առաջարկում՝ Լեռնային Ղարաբաղը թողնելով Ադրբեջանի կազմում։

Ընդդիմությունը բազմիցս հայտնել է, որ իրենք կողմ են ռուսական առաջարկներին, մինչդեռ Փաշինյանը հակառակ ուղղությամբ էր գնում, և միայն այժմ, ՌԴ նախագահի և իշխանությունների ճնշման ներքո ընդունելով ռուսական առաջարկները, Փաշինյանը փորձում է այս հանգամանքն օգտագործել ոչ այնքան Արցախի հարցը կարգավորելու, այլ ընդդիմությանը հարվածելու համար։ Բնականաբար խորհրդարանական ընդդիմության ներկայացուցիչները այս «կուտը չեն կերել» և չեն արձագանքել Փաշինյանի անհեթեթ հայարարություններին։

Փաշինյանը, հընթացս, նաև մեղադրանքի սլաքներն ուղղել է Արցախի քաղաքական դաշտի դեմ, որեղից ևս քննադատություններ են հնչում, նա հայտարարել է, թե Ռուսաստանի առաջարկներն ընդունելու մասին իր մոտեցումները դեռևս տարեսկզբին ներկայացրել է Արցախի նաագահ Արայիկ Հարությունյանին։ Եվ այժմ թե՛ Արցախի քաղաքական դաշտի դերակատարներ և թե՛ հայաստանյան ընդդիմությունը պարտավոր են ներկայացնել Նիկոլ Փաշինյանի խոսքի և գործի անհամապատասխանությունը և ցույց տալ, թե ով է իրականում ստում։

Կարեն Վարդիկյան