Ադրբեջանցիները կրկին շարունակում են սադրանքների դիմել Արցախում

Ադրբեջանցիները կրկին շարունակում են սադրանքների դիմել Արցախում, ընդ որում դրա համար ընտրել են բավականին ուշագրավ ուղղություն։ Նախօրեին «բնապահպան ակտիվիստների» կողմից Լաչինի ճանապարհը փակելու միջադեպից հետո, երեկ էլ այդ նույն «բնապահպան ակտիվիստները» լրագրողների և օպերատորների մի մեծ խմբի ուղեկցությամբ այցելել են Արցախի Իվանյան համայնք և ռուսական զորախմբի շտաբում հանդիպել խաղաղապահ առաքելության հրամանատար Անդրեյ Վոլկովի հետ։

Քննարկումներից հետո պաշտոնական Բաքուն հայտարարել է, թե կհետաքննի Արցախում «բնական ռեսուրսների» ապօրինի շահագործումը։ Մասնավորապես ադրբեջանցիներն աչք ունեն Դրմբոնի ոսկու և Կաշենի պղնձամոլիբդենային հանքավայրերի վրա, որոնք 44-օրյա պատերազմի ընթացքում չեն անցել Բաքվի վերահսկողության տակ, սակայն ադրբեջանական իշխանությունները մեծ ախորժակ ունեն իրենց վերահսկողությունը սահմանել հանքերի նկատմամբ և շահագործել դրանք։

Ադրբեջանական «ակտիվիստներից» հետ չեն մնում նաև ադրբեջանական լրագրողները։Նրանք երեկ փորձել են քայլելով անցնել խաղաղապահների անցակետն ու գնալ դեպի Խոջալու։ Ռուս խաղաղապահները արգելապատնեշ են կազմել և խոչընդոտել են ադրբեջանցի լրագրողների մուտքը, բանը սակայն բռնությունների չի հասել։

Ըստ էության, ռուսական խաղաղապահ զորախումբը փորձում է առայժմ ոչ բռնի մեթոդներով հարաբերվել ադրբեջանցիների հետ։ Սակայն ադրբեջանական սադրանքները վկայում են, որ վաղ, թե ուշ կամ ռուս խաղաղապահները ստիպված են լինելու ի վերջո ցույց տալ, թե ինչի համար են նրանք գտնվում Ղարաբաղում, կամ էլ ադրբեջանցիներին կհաջողվի հասնել իրենց սադրանքների հետապնդած նպատակներին։

Հայաստանի իշխանությունները բացարձակապես որևէ կերպ չեն արձագանքել ստեղծված իրավիճակին և Արցախին ու Արցախի ժողովրդին միայնակ են թողնում ադրբեջանական հրոսակների սադրանքներին դեմհանդիման։

Աննա Նադոյան