Վարչախումբը գնում է ուժայինների հավատարմությունը

Պաշտպանության նախարար Սուրեն Պապիկյանի հրամանով զինվորական ուժերի ողջ անձնակազմը ստացել է պարգևավճար մեկ պաշտոնային դրույքաչափի չափով։ Այս մասին հայտնել պաշտպանության նախարարության մամուլի քարտուղար Արամ Թորոսյանը՝ հայտարարելով, թե Ամանորյա տոներին ընդառաջ պարգևատրվել են նաև զինված ուժերի զինծառայողներ, ինչն աննախադեպ է։

Իհարկե, հրաշալի է, որ պաշտպանության նախարարությունը պարգևատրում է նաև հայկական բանակի զինծառայողներին, սակայն այս դեպքում էլ ինչպես և մյուս պետական գերատեսչությունների պարագայում գործ ունենք ոչ թե պետական նպատակային քաղաքականության, այլ ընդամենը զինված ուժերի զինծառայողների հավատարմությունը գնելու փորձի հետ, այլապես պաշտպանության նախարարությունը չէր սահմանափակվի միայն գործող զինծառայողներին պարգևատրելով, ավելին սեպտեմբերից հետո պաշտպանության նախարարությունը դադարեցրել է սեպտեմբերի 13-ի ռազմական գործողությունների հետևանքով զոհված պայմանագրային զինծառայողների ընտանիքների վճարումները, անկախ կարգավիճակից, զինծառայողը զոհված է, թե անհետ կորած, և այդ ընտանիքները հայտնվել են ծանր սոցիալական վիճակում, ուստի, եթե իշխանություններն իսկապես ցանկանային դրական և ճիշտ քայլ անել, միայնակ չէին թողնի իրենց իսկ ապիկարության հետևանքով զոհված կամ անհետ կորած զինծառայողների ընտանիքներին։

Բնականաբար, այդ ընտանիքներրը որևէ կերպ այլևս չեն կարող քաղաքական դիվիդենտներ բերել գործող իշխանությանը, ընդհակառակը, խանգարում են իրենց գոյությամբ՝ անընդհատ հիշեցնելով փաշինյանական վարչախմբի ապիկարության մասին, փոխարենը այդ գումարները կարելի էր ուղղել զինծառայողների, ոստիկանների, փրկարարների, պատգամավորների, փաշինյանական վարչախմբի հավատարիմ այլ անձանց պարգևատրմանը։

Նիկոլ Փաշինյանի իշխանությունը հրաշալի հասկացել է, որ հանրության մի զգալի մասի՝ հատկապես ուժայինների հավատարմությունը, այնքան էլ թանկ չարժե։ Ընդսմին կոպեկներով կարելի է գնել այն և օգտագործել սեփական կարիքների համար։

Մինաս Ավագյան