Մեծամորի ատոմակայանում անվտանգության ապահովման ուղղությամբ քայլեր են ձեռնարկվում. Գրոսի
ՀԱՍԱՐԱԿՈՒԹՅՈՒՆ
Հայաստանի Մեծամորի ատոմակայանում անվտանգության ապահովման ուղղությամբ քայլեր են ձեռնարկվում, որոշակի քննարկումներ են անցկացվել։ Այս մասին ասել է Ատոմային Էներգիայի միջազգային գործակալության գլխավոր տնօրեն Ռաֆայել Գրոսին:
«Այնտեղ է գտնվում ԱԷՄԳ-ի առաքելությունը, և մենք շփվում ենք հայ գործընկերների հետ՝ անվտանգության չափորոշիչներն ապահովելու համար»,- նշել է այցով Ադրբեջանում գտնվող պաշտոնյան:
Նա կարծիք է հայտնել, որ միջազգային խաղաղության և կայունության պահպանման համար բոլոր ջանքերը կարևոր են, այդ թվում՝ Չմիավորման շարժումը և այլ հարթակներ նույնպես պետք է խրախուսեն դա:
«Մենք աշխատում ենք և՛ Հայաստանի, և՛ Ադրբեջանի հետ։ Մենք համագործակցում ենք կայունության ապահովման համար, ինչը շատ կարևոր է։ Դժվար ժամանակներում շատ կարևոր է, որ դիվանագիտական ուղիները բաց մնան»,- հավելել է Գրոսին:
