Արսեն Թորոսյանն այդպես էլ իր տեղը չի գտնում օրենսդիրում և ուզում է վերադառնալ գործադիր աշխատանքի

Առողջապահության նախարարությունը հայտարարում է, որ կարմրուկի տարածումը եղել է օտարերկրյա հանրապետությունից ներթափանցած և, նույնիսկ, ըստ Անահիտ Ավանեսյանի՝ այդ տարածման շղթաներից մեկը հնարավոր է եղել կանխել։

Իսկ ի՞նչ է ասում առողջապահության նախկին նախարար, այժմ ՔՊ պատգամավոր  Արսեն Թորոսյանը։ Նա 4 օր առաջ հայտարարեց, որ վարակի տարածումը ներհիվանդանոցային է։  Ըստ Թորոսյանի՝ պատճառը չպատվաստված բուժաշխատողն է եղել։ Նաև «ցավով» նշել է, որ չպատվաստված բուժաշխատողները երբեմն հորդորում են չպատավաստվել նույնիսկ իրենց բարեկամ-հարազատներին, և կոչ է արել տուրք տալ իրենց ակադեմիական գիտելիքներին, այլ ոչ թե այլ աղբյուրներին։

Առողջապահության նախարարությունից լրատվականներին մեկ պատասխան են տալիս՝ չեն մեկնաբանում Արսեն Թորոսյանի ասածը։

Այստեղ, իհարկե, պետք է թողնել, որ հայտարարությունները նախարարությունն անի, ինչպես Արսեն Թորոսյանի նախարար եղած ժամանակ էր։ Իհարկե մի տարբերությամբ՝ այն ժամանակ կիքսերը նախարարությունն էր տալիս։

Ուշագրավ է, որ Արսեն Թորոսյանն այդպես էլ իր տեղը չի գտնում օրենսդիրում և ուզում է վերադառնալ գործադիր աշխատանքի, իսկ գործադիրում հանգիստ աշխատող Անահիտ Ավանեսյանն իր կադրն էր։ Բանն այն է, որ, սա հաշվի առնելով, Ավանեսյանը հրապարակային չի հակադարձում Թորոսյանին, բայց ակնհայտ է, որ հարաբերությունները լարված են։ Թորոսյանը պարբերաբար խառնվում է նախարարության աշխատանքին։  Չլինելով նույնիսկ ԱԺ Առողջապահության և սոցիալական հարցերի մշտական հանձնաժողովի անդամ՝ Թորոսյանն այցելում էր հիվանդանոցներ և այլն։ Հիմա էլ հայտարարում է, որ անհարժեշտ է օրենսդրական նախաձեռնություն, ըստ որի՝ կարգելվի չպատվաստված երեխաների մուտքը ուսումնական հաստատություններ։

Իհարկե, սա պատվաստումը պարտադիր հայտարարելու նման մի բան է,  բայց դա այլ հարց է։ Եթե կա նման նախաձեռնության անհրաժեշտություն, որը 95 տոկոս պատվաստման ֆոնին, մի փոքր վիճելի է, ամեն դեպքում դրա մասին պետք է խոսի Առողջապահության նախարարը, կամ գոնե խորհրդարանի հանձնաժողովի նախագահը։ 

Աննա Ավետիսյան