Ադրբեջանում 32 «իրանական լրտես» է ձերբակալվել

Ադրբեջանում իրավապահները հատուկ օպերատիվ միջոցառումներ են իրականացրել, ինչի արդյունքում հայտնաբերվել և ձերբակալվել է 32 մարդ։ Այս մասին հայտնում է ԱՊԱ-ն։

«Իրենց հավատացյալ անվանողները, սոցիալական ցանցերի միջոցով, պաշտամունքի վայրերում, այլ արարողությունների ժամանակ, որտեղ մարդիկ են հավաքվել, չարաշահելով մեր երկրում կրոնի ազատությունը, քարոզչություն են իրականացրել հօգուտ Իրանի, իրականացրել են Ադրբեջանում հանդուրժողականության ավանդույթների խաթարմանն ուղղված օտարերկրյա առաջադրանք։

Նրանք հայտարարել են «Քերիմե» պետության ստեղծման մասին, ԱՀ գործող սահմանադրական կարգի բռնի փոփոխության բացահայտ կոչեր արել։ Նշված անձինք, որոնք կատարել են օտարերկրյա հատուկ ծառայությունների պատվերները, ծրագրում էին կրոնական խտրականություն սերմանել, առճակատում ստեղծել, անկարգություններ հրահրել հասարակության մեջ եւ  կրոնական արմատականություն քարոզել։

Հետաքննությունը պարզել է, որ նրանք Իրանի Իսլամական Հանրապետությունից ուղարկված թմրամիջոցների վաճառքից ստացված խոշոր գումարը  ծախսել են Ադրբեջանում կրոնական արմատականություն քարոզելու եւ այլ վնասակար գործողություններ ֆինանսավորելու համար։ Կատարվում են օպերատիվ-հետախուզական եւ քննչական գործողություններ»,- նշվում է հաղորդագրությունում։