Գուցե հենց այս շարքն է Փաշինյանի նշած 5-րդ շարասյան մասը

Վերաքննիչ դատարանը՝ քննելով դատախազության բողոքը, Գրիգորի Խաչատուրովին կալանավորելու որոշում է կայացրել։ Հիշեցնենք, որ առաջին ատյանի դատարանը մերժել էր կալանքի միջնորդությունը և դատախազությունն այդ որոշումը բողոքարկել էր վերաքննիչ դատարան։ Վերաքննիչը բեկանել է առաջին ատյանի որոշումը և բավարարել դատախազության միջնորդությունը։ Խաչատուրովը կալանավորվել է 2 ամիս ժամկետով: 

2006-2010 թվականներին ՀՀ ՊՆ N զորամասի հրամանատարի պաշտոնը զբաղեցրած Գրիգորի Խաչատուրովը մեղադվում է «պաշտոնեական դիրքի օգտագործմամբ հանցավոր ճանապարհով ձեռք բերված առանձնապես խոշոր չափերով անշարժ գույքն օրինականացնելու (փողերի լվացում) համար»։

Խոսքը ՊՆ-ին ոչ պետքական մի զորամասի տարածքն աճուրդով վաճառելու մասին է, որը գնել է Խաչատուրովի ընկերը։

Ո՞վ է այն դատավորը, որ կալանավորման որոշում է կայացրել: Վերաքննիչ քրեական դատարանի դատավոր, ԲԴԽ անդամ Մեսրոպ Մակյան, ում եղբայրը՝ Արթուր Մակյանը, մեղադրվում է Ղազախստանում առանձնապես խոշոր չափերով հարկեր չվճարելու մեջ: Առաջիկա օրերին սպասվում է նաև Մեսրոպ Մակյանի նշանակումը հակակոռուպցիոն վերաքննիչ դատարանի նախագահի պաշտոնին։ Բացի այդ էլ Մակյանի որդին, ով այս պահին դատավորի օգնական է աշխատում ևս պատրաստվում է նշանակվել դատավոր:
Այստեղ ուշագրավ է այն հանգամանքը, որ այս գործով վաղեմության ժամկետը լրանում է մի քանի ամսից:

Նկատենք, որ օրերս Փաշինյանն իր ասուլիսում հայտարարեց, որ սպասվում է նոր պատերազմ և այս փուլում առնվազն պետք է ամեն ինչ մի կողմ դնեին և Խաչատուրովին վերադարձնեին բանակ: Ուշագրավ է նաև այն, որ 44-օրյա պատերազմից առաջ էլ երկրում որոշակի անձանց ձերբակալություններ և կալանավորումներ եղան: Մի քանի օր տարբերությամբ երկարացվեց Դավիթ Գալստյանի և Միքայել Արզումանյանի կալանավորման ժամկետները: Կալանքի տակ է նաև Դավիթ Տոնոյանը, ԱԺ-ում հարցաքննվում է Օնիկ Գասպարյանը և այլն:

Գուցե հենց այս շարքն է Փաշինյանի նշած 5-րդ շարասյան մասը: Ընդ որում կարևոր է այն հանգամանքը, որ Փաշինյանը նույն ասուլիսում ասաց, որ շուտով հանրության համար էլ տեսանելի պատկեր կձևավորվի այս մասով, իսկ դատավորները պետք կոշտ լինեն: Հենց այս հայտարարություններն էլ դատարաններն ի գիտություն են ընդունել:

Աննա Նադոյան