Պուտինը նշել է, որ Ռուսաստանի և ԱՄՆ-ի հարաբերությունները խորը ճգնաժամ են ապրում

ՌԴ նախագահ Վլադիմիր Պուտինը Կրեմլում օտարերկրյա դեսպաններին հավատարմագրերի հանձնման արարողության ժամանակ ասել է, որ աշխարհում ներկայիս իրավիճակը պարզ չէ, կուտակվել են բազմաթիվ հակասություններ։ Այս մասին հայտնում է РИА Новости-ն։

 Ապրիլի 5-ին Պուտինը ընդունել է օտարերկրյա նոր դեսպանների, այդ թվում՝ ԱՄՆ-ի, ԵՄ-ի, Սիրիայի, Դանիայի, Նորվեգիայի, Իրաքի և Աբխազիայի դիվանագետների հավատարմագրերը:

 Ինչպես նշել է ՌԴ նախագահը, Ռուսաստանի հարաբերությունները Եվրամիության հետ մեծապես դեգրադացվել են, քանի որ ԵՄ-ն քաղաքական առճակատում նախաձեռնեց Ռուսաստանի Դաշնության հետ։

 Ընդ որում, Պուտինն ընդգծել է, որ Մոսկվան հույս ունի, որ երկրի հարաբերությունները ԵՄ-ի հետ կվերականգնվեն։

 Նա նաև ափսոսանք է հայտնել, որ Ռուսաստանի և ԱՄՆ-ի հարաբերությունները, որոնցից, ըստ նրա, ուղղակիորեն կախված են համաշխարհային անվտանգությունն ու կայունությունը, խորը ճգնաժամ են ապրում։

 Բացի այդ, պետության ղեկավարը հավելել է, որ Ռուսաստանը ակնկալում է, որ օտարերկրյա գործընկերները հավատարիմ կմնան իրավահավասարության սկզբունքներին։