Ամերիկյան դեսպանատունը հանձնարարություն է տվել իր հայաստանյան լրատվամիջոցներին

Հայաստանում Միացյալ նահանգների դեսպանատունը իրեն ենթակա տեղեկատվական միջոցներին շրջաբերական է իջեցրել այլևս լրատվամիջոցներում չօգտագործելու Արցախի անկախություն կամ ինքնորոշման իրավունք արտահայտությունները, փոխարենը կարող են օգտագործել միայն Արցախի անվտանգության հարցեր, իրավունքներ տերմինները։

Ենթադրաբար Միացյալ նահանգների ազդեցությամբ գործող ԶԼՄ-ները հետայսու հարկադրված կլինեն Արցախի անկախության և ինքնորոշման մասին գրելու փոխարեն անդրադառնալ միայն անվտանգային հարցերին, կամ էլ Արցախի բնակիչների իրավունքներին։

Այս նարատիվն առաջ է մղում ոչ միայն ԱՄՆ դեսպանատունը, այլև Հայաստանում Եվրամիության պատվիրակությունը։

Մեր աղբյուրների փոխանցմամբ, նման մի շրջաբերական էլ իջեցրել են Եվրամիության ազդեցությամբ գործող ԶԼՄ-ներին։ Փաստացի արևմտյան ազդեցությամբ «սորոսական» եւ ոչ «սորոսական» լրատվամիջոցները շատ ավելի լուրջ գրաքննության են ենթարկվում, քան ռուսական ազդեցության տակ գտնվող ԶԼՄ-ները։

Ի դեպ այս խոսույթը նոր չէ, 2020 թվականի 44-օրյա պատերազմից հետո փաշինյանական իշխանությունը երբեք չի օգտագործել Լեռնային Ղարաբաղի հանրապետություն տերմինը և հրաժարվում է կատարել ընդդիմության պահանջը՝ հայտարարել, թե Արցախը երբեք չի լինի Ադրբեջանի կազմում։

Օրերս տեղեկություն տարածվեց, որ նման մի շրջաբերական էլ իջեցվել է բանակին, այլևս պաշտոնական գրագրության մեջ և հայտարարություններում՝ Արցախի Հանրապետություն արտահայտությունը չօգտագործելու պահանջով։

Այս փաստերը վկայում են, որ Արևմուտքի և Փաշինյանի շահերը համընթաց են և դրանց վերջնարդյունքում Արցախն իսկապես հայտնվելու է Ադրբեջանի կազմում, եթե Հայաստանում իշխանափոխություն չլինի։ Փաշինյանն ինքն է գծել այս տաբուները թուրք-ադրբեջանական տանդեմի պահանջով, իսկ թե ինչու է նույն նարատիվներն առաջ մղում իբր թե Արցախի հարցով շահագրգիռ ԱՄՆ-ն և Եվրամիությունը, չափազանց ուշագրավ հարց է։

Նոնա Ստեփանյան