Սեւծովյան նախաձեռնության շրջանակում պարարտանյութեր դեռ չեն արտահանվել․ ՄԱԿ

«Սեւծովյան հացահատիկի նախաձեռնության» շրջանակում պարարտանյութեր, այդ թվում՝ ամոնիակային, դեռ չեն արտահանվել, հայտնում է «ՌԻԱ Նովոստին»՝ վկայակոչելով ՄԱԿ-ի փաստաթուղթը։

Սեւծովյան հացահատիկի նախաձեռնությունը նախատեսում է պարարտանյութերի, այդ թվում՝ ամոնիակային պարարտանյութերի արտահանում։ Սակայն պարարտանյութերի արտահանում դեռ չի եղել, ասվում է փաստաթղթում։

ՄԱԿ-ի տվյալներով՝ Սեւծովյան հացահատիկի նախաձեռնության շրջանակում արտահանվել է 29 798 277 տոննա հացահատիկ եւ այլ պարենամթերք։ Դրանցից միայն 595,169 տոննան մատակարարվել է Պարենի համաշխարհային ծրագրի նավերով՝ Աֆղանստանում, Եթովպիայում, Քենիայում, Սոմալիում եւ Եմենում մարդասիրական գործողություններին աջակցելու համար:

Տեքստում ասվում է, որ այս պահին ուկրաինական նավահանգիստներում կա 14 նավ, որոնք ակնկալվում է բեռնել մոտ 600 հազար տոննա պարենով։ ՄԱԿ-ը նաեւ նշում է, որ ապրիլին սննդամթերքի արտահանումը Սեւծովյան հացահատիկի նախաձեռնության շրջանակում նվազել է 29 տոկոսով։