Ադրբեջանի նախագահի երեկ արած մի շարք հայտարարություններ հասկանալի չեն. Ճշգրտման կարիք կա. Փաշինյան
ՔԱՂԱՔԱԿԱՆՈՒԹՅՈՒՆԱԺ-ում այսօր՝ մայիսի 29-ին, ԱԺ հանձնաժողովների համատեղ նիստում 2022 թվականի պետական բյուջեի կատարողականի քննարկման ժամանակ իր ելույթում վարչապետ Նիկոլ Փաշինյանն ևս մեկ անգամ հայտարարեց՝ Հայաստանն ու Ադրբեջանը պատրաստ են ճանաչել միմյանց տարածքային ամբողջականությունը:
«Առնվազն հասկանալի չեն այս առումով Ադրբեջանի նախագահի երեկ արած մի շարք հայտարարություններ: Ես կարծում եմ, որ այստեղ և՛ Ադրբեջանը, և՛ միջազգային գործընկերները առնվազն պետք է պարզաբանեն, թե արդյո՞ք դա նշանակում է հրաժարում Բրյուսելում ձեռք բերված պայմանավորվածություններից»,- ընդգծեց վարչապետը:
Նա ԱԳ նախարար Արարատ Միրզոյանին ասաց, թե պետք է գործընկերներից ստանալ այս հարցի պատասխանը:
«Տեքստը, որ հնչել է, շատ մոտիկ է դրան, բայց ես չեմ ուզում մեկնաբանություն նել, կարծում եմ՝ այստեղ պետք է լրացուցիչ ճշգրտումներ մտցնենք, որ մեր հետագա գործողությունները պլանավորենք»,-ասաց նա:
Ավելի վաղ NEWS.am-ը հայտնել էր, որ նախօրեին Ադրբեջանի նախագահ Իլհամ Ալիեւը հայտարարել էր, որ հայ-ադրբեջանական սահմանի սահմանազատումը պետք է իրականացվի Բաքվի պայմաններով. «Սահմանների սահմանազատումը պետք է լինի մեր պայմաններով, այսինքն՝ արդար պայմաններով։ Խաղաղության պայմանագիրը պետք է հիմնված լինի միջազգային նորմերի վրա, Նախիջևան տանող ճանապարհը պետք է բաց լինի։ Հայաստանի զինված ուժերի բոլոր ներկայացուցիչները պետք է դուրս բերվեն Ղարաբաղից։ Սրանք են մեր պայմանները։ Ադրբեջանի եւ Հայաստանի միջեւ պետք է խաղաղության պայմանագիր կնքվի՝ հիմնված տարածքային ամբողջականության սկզբունքի վրա», - հայտարարել էր Ալիևը։