Ոստիկանությունում ձևավորվում են նոր ստորաբաժանումներ․ Արփինե Սարգսյան

««Ոստիկանության մասին» օրենքում լրացում կատարելու մասին» եւ կից նախագծերի փաթեթով առաջարկվում է նախատեսել, որ ոստիկանությունը պարտավոր է միջոցներ ձեռնարկել նաեւ ընտանիքում բռնության ենթարկված մարդկանց օգնություն ցույց տալու համար:

«Երեխայի իրավունքների մասին» օրենքում առաջարկվում է ամրագրել լիազորող նորմ, որի համաձայն ՀՀ կառավարությունը սահմանում է բռնության ենթարկված երեխայի՝ պաշտպանության կամ աջակցության տրամադրման նպատակով համապատասխան մարմիններ ուղղորդման կարգը, բռնության ենթարկված երեխային տրամադրվող աջակցության ձեւերը եւ տրամադրման կարգը:

«Ընտանիքում բռնության կանխարգելման, ընտանիքում բռնության ենթարկված անձանց պաշտպանության եւ ընտանիքում համերաշխության վերականգնման մասին» օրենքում «ոստիկանության ծառայող» արտահայտությունը փոխարինվել է «ոստիկանության իրավասու ծառայող» արտահայտությամբ, «ոստիկանության պետ» արտահայտությունը՝ «ներքին գործերի նախարար» արտահայտությամբ:

ՀՀ ՆԳ նախարարի տեղակալ Արփինե Սարգսյանը նշել է, որ ոստիկանությունում ձեւավորվում են նոր ստորաբաժանումներ եւ վերաձեւավորվում են առկա ստորաբաժանումները, ինչը հանգեցնում է նաեւ որոշակի օրենսդրական եւ գործառութային փոփոխությունների: Հաշվի առնելով վերոգրյալը, ինչպես նաեւ այն, որ վերանայվելու է համայնքային ոստիկանության ծառայողների լիազորությունների շրջանակը, փոփոխվելու է հասարակությանը մատուցվող ծառայությունների տրամաբանությունն ու բարեփոխվելու են գործառույթները:

Նշվել է, որ Համայնքային ոստիկանության վերաիմաստավորման տեսլականի շրջանակում նախատեսվում է օպտիմալացնել ծառայության գործառույթները՝ հնարավորություն ընձեռելով կենտրոնանալ համայնքի համար զգայուն եւ կարեւոր հարցերի վրա:

«Մեր ծառայողները պետք է լինեն առավել պրոֆեսիոնալ»,- ասել է Արփինե Սարգսյանը:

Հարակից զեկուցող, հանձնաժողովի անդամ Վիլեն Գաբրիելյանը ներկայացրել է մի շարք առաջարկություններ, որոնք կքննարկվեն առաջինից երկրորդ ընթերցում ընկած ժամանակահատվածում։