Պարենի համաշխարհային գները մայիսին նվազել են մինչեւ երկամյա նվազագույն մակարդակ. ՄԱԿ

Պարենի համաշխարհային գների ինդեքսը մայիսին նվազել է՝ հասնելով վերջին երկու տարվա ամենացածր մակարդակին, քանի որ բուսայուղերի, ձավարեղենի եւ կաթնամթերքի գների կտրուկ անկումը գերազանցել է շաքարի եւ մսի գների աճը՝ ըստ Պարենի եւ գյուղատնտեսության կազմակերպության (FAO) տվյալների, հաղորդում է Reuters-ը։

Պարենի եւ գյուղատնտեսության կազմակերպության գների ինդեքսը, որը հետեւում է աշխարհում ամենաշատ վաճառվող պարենային ապրանքներին, մայիսին կազմել է միջինում 124,3 կետ՝ նախորդ ամսվա վերանայված 127,7 կետի դիմաց, ուրբաթ հայտնել է գործակալությունը:

Մայիսի ցուցանիշը ամենացածրն է դարձել 2021 թվականի ապրիլից ի վեր, ինչը նշանակում է, որ ընդհանուր ցուցանիշն այժմ 22 տոկոսով ցածր է պատմական գագաթնակետից, որը ձեռք է բերվել 2022 թվականի մարտին՝ Ուկրաինայում հակամարտության սկսվելուց հետո։

Հացահատիկի առաջարկի եւ պահանջարկի մեկ այլ զեկույցում FAO-ն այս տարի հացահատիկի համաշխարհային արտադրությունը կանխատեսում է 2,813 միլիարդ տոննա, ինչը 1 տոկոսով ավելին է, քան 2022 թվականը, ինչը հիմնականում արտացոլում է եգիպտացորենի արտադրության ակնկալվող աճը: