Երևանում հաղթելուց հետո «Ապրելու երկիրը» իշխանափոխության կգնա

«Ապրելու երկիր» կուսակցությունը բավականին ակտիվ է պատրաստվում Երևանի ավագանու առաջիկա ընտրություններին և վստահեցնում՝ ավագանու ընտրություններում հաղթելուց հետո իշխանափոխության օրակարգն ավելի առարկայական կդառնա։

Մինչ խորհրդարանական և տիտղոսային ընդդիմությունն ու ընդդիմադիր այլ ուժեր օրեցօր կորցնում են իրենց ընտրազանգվածն ու վստահությունը հանրության մեջ, «Ապրելու երկիրը» բավականին լուրջ և կոշտ քարոզարշավ է իրականացնում՝ իսկական գլխացավանք դառնալով «Քաղաքացիական պայմանագրի» համար։ Կուսակցության համահիմնադիրներից Մեսրոպ Առաքելայնը երեկ հայտարարել է, թե Երևանի ավագանու ընտրությունները 2021 թվականի նման չի լինի, երբ հասարակությունը ստիպված էր երկու բևեռներից ընտրել մեկին, և ընտրություններին ընտրապայքարը կգնա դրական ուղղվածությամբ։ Լրագրողների ճեպազրույցում Առաքելյանը հույս է հայտնել, որ հասարակությունը պետք է ընտրություն կատարի հանուն Երևանի, ոչ թե, որ ուժերից մեկն ընտրապայքարում չհաղթի։

Կուսակցությունը թեև փորձում է ինտրիգ պահել, թե ով է գլխավորելու նախընտրական ընտրացուցակը, թերևս կասկած չկա, որ «Ապրելու երկիրը» ընտրություններին կգնա Մանե Թանդիլյանի գլխավորությամբ։ Թանդիլյանը օրեցօր ավելացնում է իր հանրային վստահությունը և արդեն իսկ համարվում Երևանի քաղաքապետի հիմնական թեկնածուներից մեկը։

Ի դեպ, ի տարբերություն գործող իշխանությունների և նրանց ընդդիմության, երբ քննադատությունը հիմնականում անձնավորված և հայհոյախառն է, «Ապրելու երկիրը» այս ճանապարհը չի ընտրել։ Փոխարենը հանրությանն է ներկայացնում բավականին լուրջ և պրագմատիկ ծրագիր, թե ինչպես է վերականգնելու Երևանի ենթակառուցվածքները և ինչ նոր նախաձեռնություններ են իրականացվելու։

Մասնավորապես կուսակցությունն արդեն իսկ խոստացել է, որ վերականգնելու է Երևանի խորհրդանիշներից մեկը՝ Երիտասարդական պալատը։ Կուսակցությունը նաև հուշագիր է ստորագրել «Արթուր Թարխանյան» հիմնադրամի հետ և Երիտասարդական պալատի նոր շենքի նախագիծը պատրաստ է։ Թեև շենքը նոր է, սակայն արտաքին տեսքով այն ամբողջությամբ հիշեցնում է երևանցիների սիրելի պալատը։

Նելլա Կարապետյան