ՆԱՏՕ-ի գլխավոր քարտուղարը հայտնել է դաշինքի սպառազինության պաշարների սպառման մասին

ՆԱՏՕ-ի զենքի և զինամթերքի պահեստները դատարկվել են և պետք է հնարավորինս շուտ վերականգնվեն։ Այս մասին հայտարարել է ՆԱՏՕ-ի գլխավոր քարտուղար Յենս Ստոլտենբերգը՝ ելույթ ունենալով Բեռլինում Գերմանիայի արդյունաբերության օրվա տնտեսական համաժողովում։

«Մեզ պետք է ավելի հզոր ռազմական արդյունաբերություն, որի ներկայացուցիչներն այսօր այստեղ են հավաքված։ Զենքի ու զինամթերքի մեր պաշարները դատարկ են և պետք է համալրվեն ոչ միայն Գերմանիայում, այլև ՆԱՏՕ-ի շատ երկրներում»,- ասել է նա։

Ավելի վաղ Ստոլտենբերգը հայտարարել էր, որ Հյուսիսատլանտյան դաշինքի երկրները պետք է ընդլայնեն իրենց ռազմական արտադրությունը, որպեսզի միաժամանակ Ուկրաինային զինեն զենքով և համալրեն սեփական պաշարները։