Գերմանիան խորհրդարանական Ալեքսանդր Լամբսդորֆին նշանակել է Ռուսաստանում դեսպան

Գերմանիան երկրի իշխող կուսակցություններից մեկի բարձրաստիճան օրենսդրին նշանակել է Ռուսաստանում նոր դեսպան՝ նրան հանձնելով դիվանագիտական պաշտոնը՝  Ուկրաինայում Մոսկվայի պատերազմի պատճառով լարվածության աճի ֆոնին, հայտնում է Associated Press-ը։

Չորեքշաբթի Գերմանիայի արտաքին գործերի նախարարությունը հայտարարել է, որ Ռուսաստանը պաշտոնական համաձայնություն է տվել դեսպանի պաշտոնում Ալեքսանդր Լամբսդորֆի նշանակմանը, ինչը անհրաժեշտ քայլ է մինչ պաշտոնի ստանձնումը: Հայտարարության մեջ ասվում է նաեւ, որ սպասվում է, որ նա աշխատանքի կանցնի այս ամառ։

Լամբսդորֆը կփոխարինի հեռացող դեսպան Գեզա Անդրեաս ֆոն Գեյրին, որը պաշտոնավարում է 2019 թվականի սեպտեմբերից։

56-ամյա Լամբսդորֆը 1995 թվականից աշխատում է Գերմանիայի դիվանագիտական ծառայությունում: 2003 եւ 2004 թվականներին նա աշխատել է ԱԳՆ-ի ռուսական վարչությունում։