Շնորհակալ եմ Պուտինին ու Միշուստինին՝ Վերին Լարսի անցակետի հարցում հետեւողական աշխատանքի համար. Փաշինյան
ՔԱՂԱՔԱԿԱՆՈՒԹՅՈՒՆՀաճույքով արձանագրում ենք, որ մեր երկարատեւ խոսակցությունը ՌԴ-ի մեր գործընկերների հետ բերել է կոնկրետ արդյունքի: Այս մասին այսօր՝ հունիսի 22-ին, կառավարության նիստում հայտարարեց վարչապետ Նիկոլ Փաշինյանը՝ անդրադառնալով նրան, որ Վերին Լարսի անցակետի թողնունակությունն ավելացել է:
Նա հարց ուղղեց փոխվարչապետ Մհեր Գրիգորյանին, թե արդյոք կարող ենք ասել, որ հերթերի հարցը դրանով լուծվում է, ինչին փոխվարչապետը պատասխանեց. «2021-ի վերջից, 2022-ի ընթացքում եւ այս տարվա արդյունքներով անցակետում 11 անցուղիների թիվը դարձել է 39-ը, ինչը շատ մեծ ու կարեւոր փոփոխություն է: Դրանցից 24-ը մարդատար մեքենաների համար է, որ քաղաքացիները կոմֆորտ ունենան: Մենք 2020-2021 թվականներին ռեկորդը եղել է օրական 300 բեռնատար, այսօր մոտ 1500 է: Ընդ որում, 409 մեքենայի համար ազատ անցուղի կար:
Ռուսական կողմում կա մեկ անցուղի ոչ գաբարիտային մեքենաների համար, ինչը եւս կարեւոր է, եւ եւս երկու անցուղի կա ավտոբուսների համար: Սա մի լուծում է, որը հայկական բեռների համար նորեւէ խոչընդոտ չպետք է առաջացնի: 11-ից 39 անցուղի դառնալը հնարավոր չէ, որ դրական էֆեկտներ չառաջացնի:
Ընդ որում կարեւոր է, որ վրացական կողմում եւս մինչեւ 2024-ի վերջը 9-ից դառնալու է 15 անցուղի: Շատ մեծ գործ է արել ռուսական կողմը»:
Իր հերթին Նիկոլ Փաշինյանը նկատեց, որ այս հարցը մշտապես եղել է ՌԴ նախագահի եւ ՌԴ վարչապետի հետ քննարկումների իր օրակարգում. «Ուզում եմ շնորհակալություն հայտնել եւ նախագահ Պուտինի եւ վարչապետ Միշուստինին այս հարցում հետեւողական աշխատանքի համար: Նաեւ դա Վրաստանի վարչապետի հետ մեր աշխատանքային օրակարգում է եղել, եւ վարչապետ Ղարիբաշվիլիին եմ ուզում շնորհակալություն հայտնել: Գիտեմ, որ շատ մեծ տեմպով աշխատանքներ են գնում: Այնտեղ նաեւ թունելի շինարարություն է: Իհարկե, սա գլոբալ լոգիստիկ վերադասավորումների հետ կապ ունի նաեւ»,-ասաց վարչապետը:
