Փաշինյանի արշավը Հայաստանի խորհրդանիշների դեմ

Հայաստանի խորհրդանիշների՝ զինանշանի դեմ հարձակումներն, ըստ ամենայնի, ուղղված են Թուրքիայից, և Նիկոլ Փաշինյանը հենց թուրքական կողմի պահանջով է արշավ սկսել Հայաստանի զինանշանի դեմ։

Երեկ Կառավարության նիստից հետո ԿԳՄՍ նախարար Ժաննա Անդրեասյանն է կրկին հիշել զինանշանի մասին Նիկոլ Փաշինյանի հայտարարություններն, ինչը վկայում է, որ սա ամենևին էլ Փաշինյանի անձնական նախաձեռնությունը չէ և դրա թիկունքում բավականին լուրջ ճնշումներ կան Թուրքիայի կողմից։

Թուրքական մամուլում շրջանառվող, ապա հերքված տեղեկությունը, թե իբր ֆուտբոլային ակումբներից մեկը Հայաստանի աղավաղված զինանշանն օգտագործելու է որպես իր խորհրդանիշ, վկայում է, որ Թուրքիան ամեն ինչ փորձում է անել՝ Հայաստանին պարտադրեով փոխել իր խորհրդանիշները և հատկապես հանել Արարատ լեռն, ինչպես նաև հրաժարվել Հայոց ցեղասպանությունից։

ԿԳՄՍ նախարարը հայտարարում է, թե զինանշանի փոփոխության հարցը ձևակերպված է, պետք է մտածել այդ ուղղությամբ, բայց կոնկերետ աշխատանքային խումբ այս պահին չկա։ «Ես որպես այս ոլորտը ղեկավարող նախարար պետք է լսեմ պրոֆեսիոնալներին, որովհետև շատ սպեսցիֆիկ հարց է, ես կարծում եմ, որ մտածելու բան ունենք»,- նշել է նախարարը։

Նրա խոսքով՝ մասնագիտական խումբը սկսել է աշխատել 5 տարի առաջ, հիմա կարիք կա վերադառնալու այդ գործընթացին։ Հարցի մեջ բազմաթիվ շերտեր են նկարագրված, օրինակ առյուծ, այս պահին չեմ ուզում մտնել մասնագիտական խոսակցության մեջ։ Մենք մեր պատմությունից չենք հրաժարվում, ուղղակի պետք է հասկանալ՝ ինչպես ենք վերաբերվում ներկային։

Մեր պետության խորհրդանիշները պետք է արտացոլեն մեր այսօրվա պետությունն, ասել է նախարարը։ Նույն հաջողությամբ մեր այսօրվա պետության վիճակը և նրա ղեկավարությունը նկարագրելու համար, Փաշինյանի վարչախումբը կարող է, օրինակ, առաջարկել զինանշանի վրա ճխլված առնետ պատկերել։

Նիկոլ Փաշինյանն երեկ մեկ այլ ուշագրավ հայտարարություն է արել կառավարության նիստում, խոսել թանգարանների մասին, նշել, թե թանգարաններ կան օրը մի մարդ է մտնում։ «Թանգարանը հո պահեստ չի՞։ Գուցե պետք է փակել դրանք»,- ասել է Փաշինյանը։

Սոցիալական ցանցերի օգտատերերի գնահատմամբ՝ Փաշինյանի այս հայտարարություններն ոչ այլ ինչ են, քան ուղիղ թիրախ հայոց ցեղասպանության թանգարանի դեմ։ Գիտահետազոտական այդ ինստիտուտն, որտեղ ահռելի աշխատանք է կատարվում Հայոց ցեղասպանության ուսումնասիրման, արխիվների վերհանման և աշխարհին ներկայացնելու ուղղությամբ, ևս Թուրքիայի թիրախում է։

Արմեն Խաչատրյան