Գարեգին Նժդեհ փողոցում կառանձնացվեն ավտոբուսային գծեր

Հասարակական տրանսպորտի համար երթևեկելի նոր գոտիների ներդրման աշխատանքների շրջանակում իրականացվում է Գարեգին Նժդեհ փողոցի երթևեկության կազմակերպման փոփոխության սխեմաների մշակում: Այս մասին NEWS.am-ը տեղեկանում է Երևանի քաղաքապետարանից:

«Այստեղ ևս կառանձնացվեն ավտոբուսային գծեր: Փողոցն ընտրվել է՝ հաշվի առնելով թվով 21 հասարակական տրանսպորտի երթուղիների սպասարկումն ու ինտենսիվությունը»,- ասված է հաղորդագրության մեջ։

Նշենք, որ Երեւանում ավտոբուսի համար ավտոբուսային գծեր են առանձնացվել նաեւ Գայի պողոտայում, ինչը մեծ խցանումների պատճառ է դարձել եւ առաջացրել հասարակության մեծ մասի դժգոհությունը:  Որոշ խաչմերուկներում ավտոմեքենաների անցնելու համար մնացել է միայն մեկ գիծ եւ ամբողջ հոսքը պետք է այդ մեկ գծով անցնի: