Հուսով ենք՝ Չինաստանի նկատմամբ հետաքրքրությունը Հայաստանում կավելանա. CIPCC տնօրեն Յու Լեյ
ՔԱՂԱՔԱԿԱՆՈՒԹՅՈՒՆ
Չինաստանի միջազգային մամուլի կենտրոնի տնօրեն Յու Լեյը NEWS.am-ին տված հարցազրույցում մեկնաբանել է Հայաստանի հետ բարեկամական հարաբերությունների զարգացումը։
«Չինաստանի հանրային դիվանագիտության ասոցիացիան (CPDA) 2014 թվականից կազմակերպում է Չինաստանի միջազգային մամուլի կենտրոնի (CIPCC) ծրագրեր: Ամբողջ աշխարհից լրագրողներին հրավիրում ենք այցելել Չինաստան, ծանոթանալ երկրի մշակույթին և մասնակցել մեր մեդիա ծրագրերին։ 2018 թվականից մենք կազմակերպում ենք դասախոսություններ Չինաստանի ավանդույթների, երկրի տնտեսության, դիվանագիտական միջոցառումների, մեր լրատվամիջոցների աշխատանքի վերաբերյալ։ Ինչ վերաբերում է այս ծրագրերին Հայաստանի մասնակցությանը, ապա ուրախ ենք, որ հայ լրագրողները դրանց մասնակցում են 2018 թվականից։
Հուսով ենք, որ Չինաստանի նկատմամբ հետաքրքրությունը Հայաստանում կավելանա, և ձեր երկրի քաղաքացիները խորը պատկերացում կունենան Չինաստանի սոցիալ-տնտեսական զարգացման, դիվանագիտության, մշակույթի, գիտության և տեխնոլոգիաների մասին։ Հուսով ենք, որ մեր երկրի նկատմամբ այս հետաքրքրությունն այնուհետև կամուրջ կդառնա մեր պետությունների միջև ավելի սերտ բարեկամության համար»,- ասաց պարոն Յու Լեյը:
Հուլիսի 31-ին Պեկինում մեկնարկել է Չինաստանի հանրային դիվանագիտության ասոցիացիայի (CPDA) Չինաստանի միջազգային մամուլի կենտրոնի CIPCC ծրագիրը: Ծրագրի շրջանակներում կենտրոնը դասախոսություններ է անցկացնում Չինաստանի սոցիալ-տնտեսական զարգացման, դիվանագիտության, մշակույթի, գիտության և տեխնոլոգիայի, լրագրության ոլորտում վերապատրաստման և պրակտիկայի վերաբերյալ, կազմակերպում է լրագրողների հանդիպումներ համապատասխան պետական գերատեսչությունների, ձեռնարկությունների, վերլուծական կենտրոնների և լրատվամիջոցների հետ և անցկացնում ուղևորություններ ՉԺՀ-ի նահանգներ:
