Արցախը Փաշինյանի հոր կալվածքը չէ, որ ինքը որոշի, թե Արցախն ումն է, ով պետք է այստեղ ապրի. Դավիթ Գալստյան

Եթե Հայաստանի իշխանությունները թելադրում են Արցախի իշխանություններին, թե ինչ քայլեր պետք է արվեն, մատ են թափ տալիս ամբողջ ժողովրդի վրա, մեղավորությունը փնտրում են հայերի մեջ, ապա իրավիճակի հանգուցալուծումը չի լինելու: Այս մասին NEWS.am-ի հետ զրույցում նշեց Արցախի «Արդարություն» խմբակցության պատգամավոր Դավիթ Գալստյանը:

«Քանի դեռ մենք ներսում միասնական չենք, որեւէ արտաքին հարթակից սպասելիքները սին պատրանքներ են լինելու: Մենք տեսնում ենք, որ պարտված իշխանությունների մոտ այդ համախմբումն ապահովել չենք կարողանում, ուստի դա հասկանալով, իրենք պետք է հեռանան եւ հաջորդ իշխանությունները փորձեն ճիշտ կետից սկսեն այդ բանակցություն ու երկխոսությունը, որպեսզի ունենանք հաջողություն: Հակառակ դեպքում կործանվելու է Արցախը, եւ դոմինոյի էֆեկտով Ադրբեջանը Հայաստանից պահանջելու է նորանոր տարածքներ, եւ կործանել Հայաստանը»,-ասաց նա:

Անդրադառնալով նրան, որ ՀՀ վարչապետ Նիկոլ Փաշինյանը հայտարարում է, թե Արցախն Ադրբեջանի մաս է, ընդդիմադիր պատգամավորն ասաց. «Արցախը Նիկոլ Փաշինյանի հոր կալվածքը չէ, որ ինքը որոշի, թե Արցախն ումն է, ով պետք է այստեղ ապրի: Նիկոլ Փաշինյանի նման հայտարարությունները որեւէ  ուժ չունեն, հակասահմանադրական են: Ցավոք սրտի, միջազգային հանրությունը հիմնվելով այդ անհիմն հայտարարությունների վրա, այսօր ինչ-որ տեղ մեզ համար ավելի վատ պայմաններ է ստեղծում: Դա չի նպաստում մեր վաղվա օրվան»:

Նրա խոսքով, հայկական կողմն իր ցուցաբերած պասիվությամբ ավելի է խորացնում այս ճգնաժամը. «Մինչեւ հայկական կողմն իր ձեռքի տակ ունեցած ամբողջ գործիքակազմով չուղղվաի այս իրավիճակը հանգուցալուծելուն, որեւէ միջնորդ երկրի կամ հավաքական Արեւմուտքի խոսակցություններն անհիմն են լինելու: Ինչ բանակցություն ուզում է լինի, ռուս-ադրբեջանական, ամերիկա-ադրբեջանական, արդյունք չի տալու: Այդ գործիքակազմն է՝ դիմել ՄԱԿ Անվտանգության խորհրդին, որ Ադրբեջանը չի կատարում Հաագայի դատարանի որոշումը, փակել Ադրբեջանի համար օդային տարածքները, կոչ անի Ադրբեջանին օդային բլոկադայի մեջ առնել եւ այլն: Եթե Հայաստանն այս հարցերը չի բարձրաձայնում, մենք այլ երկրներից ակնկալիք չենք կարող ունենալ»: