2023 թվականի հուլիսը պատմության մեջ ամենաշոգ ամիսն է եղել. ինչ է սպասվում մոլորակին՝ հաջորդիվ

2023 թվականի հուլիսը պատմության մեջ ամենաշոգ ամիսն է եղել. այս մասին այսօր հայտնել է Եվրամիության՝ Երկրի դիտարկման ծառայությունը։

Նշանավորվելով ամբողջ աշխարհում ջերմային ալիքներով և անտառային հրդեհներով՝ հուլիսին գլոբալ միջին ջերմաստիճանն ավելի բարձր է եղել, քան 2019 թվականի հուլիսին գրանցված ռեկորդը։

Վերջին մեկ ամսվա ընթացքում օվկիանոսները տաքացել են կես աստիճանով, իսկ Հյուսիսային Ատլանտյան օվկիանոսը՝ 1,05 աստիճանով։ Անտարկտիդայում սառույցի ռեկորդային ցածր մակարդակ է գրանցվել՝ 15%-ով ցածր միջինից տարվա այս եղանակին։

Գիտնականները հիմնական պատճառը տեսնում են մարդու գործունեության հետևանքների մեջ՝ ածուխի, նավթի և բնական գազի այրման մեջ։ Իսկ ընդհանրապես գերմանացի գիտնականներն ասում էին, որ մենք այժմ ապրում ենք վերջին 10000 տարվա ամենաթեժ ժամանակները։ Բայց առավել մտահոգիչ է այն, որ, ամենայն հավանականությամբ, 2023 թվականի հուլիսի ջերմային ռեկորդը երկար չի տևի, և մեր մոլորակը կշարունակի տաքանալ։

Copernicus-ի փոխտնօրեն Սամանտա Բուրջեսն ասել է, որ 2023 թվականը «ներկայումս երրորդ ամենատաք տարին է մինչ այս պահը»։

Բուրջեսը նախազգուշացրել է, որ տվյալները ցույց են տալիս, որ աշխարհը կբախվի «սարսափելի հետեւանքների»։

Հիշեցնենք, որ ՄԱԿ-ի ղեկավար Անտոնիո Գուտերեշը վերջերս  կոչ է արել՝ զգուշացնելով, որ ջերմաստիճանի «սարսափելի» աճը «միայն սկիզբն է»։

Արտանետումները նվազեցնելու համար անհապաղ և ուժեղ գործողությունների կոչ անելով՝ Գուտերեշը հայտարարել էր, որ հուլիսը մարդկության պատմության մեջ ամենաշոգ ամիսն է լինելու։