Խնդրում եմ ջնջել տեսանյութը․ երեխային ավելի եք վնասում՝ ենթարկելով նրան կրկնակի զոհականացման․ փոխնախարար

Քանի որ անդադար նամակներ ու զանգեր եմ ստանում երեխայի նկատմամբ բռնության տեսարանով տեսանյութի առնչությամբ, ուզում եմ տեղեկացնել, որ դեպքի մասին տեղյակ ենք, իրավապահ մարմինները զբաղվում են։ Այս մասին գրառում է կատարել  Աշխատանքի եւ սոցիալական հարցերի նախարարի տեղակալ Տաթեւիկ Ստեփանյանը։

«Այս պահին ուղղակի խնդրում եմ՝ երեխային, տեսանյությում երեւացող մյուս երեխաներին էլ ավելի չթիրախավորելու ու խոցելի չդարձնելու համար դադարեք տեսանյութը տարածել, երեխային բաց դեմքով նույնականացնել։

Դեպքի մանրամասները պարզվելուց հետո մեր գերատեսչության լիազորությունների շրջանակում անմիջապես կձեռնարկվեն համապատասխան աշխատանքներ։

Հ.Գ. երեխաների հետ կազմակերպվելիք հետագա  աշխատանքներում ես եւ ԱՍՀՆ երեխաների հիմնահարցերի բաժնի պետը կլինենք ներգրավված»,- գրել է Ստեփանյանը: