ԱԳ նախարարի տեղակալը եւ ֆրանսիացի պատգամավորն անդրադարձել են ՄԱԿ ԱԽ-ի քննարկմանն ու ԼՂ-ի իրավիճակին

Օգոստոսի 21-ին ՀՀ ԱԳ նախարարի տեղակալ Պարույր Հովհաննիսյանն ընդունել է Ֆրանսիայի Ազգային ժողովի պատգամավոր Դիդիե Պարակյանին: Այս մասին NEWS.am-ը տեղեկանում է Արտաքին գործերի նախարարությունից:

ԱԳ նախարարի տեղակալ Պարույր Հովհաննիսյանը հաջողություն է մաղթել Դիդիե Պարակյանին խորհրդարանական մանդատի մեկնարկի կապակցությամբ՝ շնորհակալություն հայտնելով Մարսելի փոխքաղաքապետի երկարամյա պաշտոնավարման օրոք հայ-ֆրանսիական բարեկամության ամրապնդման գործում նրա անձնական ներդրման համար: 

Անդրադարձ է կատարվել նաեւ Լաչինի միջանցքի ամիսներ տեւող շրջափակման հետեւանքով Լեռնային Ղարաբաղում ստեղծված հումանիտար ծանր իրավիճակին: Երկուստեք ընդգծվել է, որ ՄԱԿ Անվտանգության խորհրդում օգոստոսի 16-ի կայացած հրատապ քննարկումը եւս ցույց է տվել ԼՂ ժողովրդի համար հումանիտար ճգնաժամի ծանր հետեւանքների գիտակցումը եւ Լաչինի միջանցքի վերաբացման կարեւորությունը՝ 2020թ. նոյեմբերի 9-ի հայտարարության եւ Արդարադատության միջազգային դատարանի փետրվարի 22-ի ու հուլիսի 6-ի որոշումներին համաձայն: