Լավրովը մեկնաբանել է Պրիգոժինի զոհվելու մասին տեղեկությունը

ՌԴ ԱԳ նախարար Սերգեյ Լավրովը կոչ է արել կենտրոնանալ փաստերի վրա, այլ ոչ թե արևմտյան ԶԼՄ-ների հայտարարությունների վրա՝ կապված «Վագներ» ՄՌԿ-ի հիմնադիր Եվգենի Պրիգոժինի ինքնաթիռի վթարի հետ, գրում է ՏԱՍՍ-ը։

«Ես չեմ հետևել, թե ինչ են գրել, ասել, ցույց  տվել այս թեմայով, և ինձ համար շատ դժվար է այստեղից որևէ մեկնաբանություն տալ։ Անմիջապես հետաքննություն է սկսվել, գործ է հարուցվել, քննիչներն աշխատում են»,- ասել է նախարարը։

Ավելի վաղ ՌԴ նախագահ Վլադիմիր Պուտինը ցավակցություն էր հայտնել ավիավթարի հետևանքով բոլոր զոհվածների ընտանիքներին և ասել, որ դրա հետաքննությունը կիրականացվի ամբողջ ծավալով  և  ավարտին կհասցվի։

Մոսկվայից Սանկտ Պետերբուրգ չվերթ իրականացնող Embraer բիզնես ինքնաթիռը չորեքշաբթի երեկոյան վթարի է ենթարկվել Տվերի մարզում։ Նախնական տվյալներով, ինքնաթիռում եղել է 10 մարդ, բոլորը զոհվել են։ Ուղևորների ցուցակում, ինչպես հաղորդել է «Ռոսավիացիան», եղել է գործարար Եվգենի Պրիգոժինը։