«Քաղպայմանագրի» կարգախոսն օգտագործում են իր դեմ

Երևանի ավագանու ընտրությունների քարոզարշավն արդեն մեկնարկել է և այսօր 6-րդ օրն է։ «Քաղաքացիական պայմանագիրն» արդեն հասցրել է պարզել, որ լրջագույն խնդիրներ ունի հատկապես քարոզչության ոլորտում։ Սոցցանցերում և երևանյան բակերում հենց ՔՊ ներկայացուցիչների հանդիպումների ժամանակ, նրանց իսկ կարգախոսն օգտագործում են իրենց դեմ։ «Ասե՛ք, կանե՛նք» այսպիսի կարգախոսով է «Քաղպայմանագիրը» մասնակցում Երևանի ավագանու ընտրություններին։

Հանրությունն, արդեն իսկ մի ամբողջ շարք պատասխաններ է տվել այս տարօրինակ և ոչինչ չասող կարգախոսին, ամենավերջին հայհոյանքից բռնած, մինչև ծաղր, ընդ որում նույնիսկ այս կարգախոսն ընդունելը վկայում է, որ «Քաղաքացիական պայմանագիրը» և նրա քաղաքապետի թեկնածու Տիգրան Ավինյանը պատկերացում չունեն, թե ինչ պետք է անեն Երևանի քաղաքապետի պաշտոնում և հարցերին մոտենում են իրավիճակային օպերատիվ լուծման տեսանկյունից՝ այն է, սպասում են, թե երբ հանրությունը պետք է ձևակերպի իր պահանջները, որպեսզի իրենք կարողանան լուծել օրվա կարևոր խնդիրները։

Երևան քաղաքի զարգացման տեսլական պարզապես գոյություն չունի։ ՔՊ մեր աղբյուրի փոխանցմամբ՝ կարգախոսն Ավինյանն է պարտադրել, նշել, թե բավականին լուրջ տեխնոլոգների հետ է զրուցել, որոնք էլ նման կարգախոս են առաջարկել։ «Քաղպայմանագիրն» արդեն իսկ չի կարող փոխել սեփական կարգախոսը, քանի որ դա արդեն լայն տարածում է ստացել, անգամ Նիկոլ Փաշինյանն է ծիծաղել՝ հասկանալով, թե ինչ հետևանքներ կարող է ունենալ նման կարգախոսը «Քաղպայմանագրի» համար։

Երևանի ավագանու ընտրություններին մասնակցող մյուս 13 ուժերի կարգախոսները ևս առանձնապես լուրջ չեն ընկալվում, սովորական տրաֆարետային ձևակերպումներ են, որոնք որևէ կերպ չեն կարող հասնել շարքային ընտրողի սրտին և առնվազն ենթագիտակցական մակարդակում համոզել մարդուն, որ պետք է ընտրել այս կամ այն քաղաքական ուժին։

Ըստ էության, Երևանի ավագանու ընտրություններն արդեն իսկ վկայում են, որ մասնակից ուժերը չունեն պատկերացում, թե ինչ են անելու և ինչպես են մասնակցելու։ Միակն այս առումով «Ապրելու երկիր» կուսակցութունն է, որը բավականին լուրջ հայեցակարգ է ներկայացրել, Երևան քաղաքի զարգացման սեփական տեսլականն ունի և լուրջ թիմով մասնակցում է ընտրություններին։

Աննա Մանուկյան