Ռուս խաղաղապահները Ղարաբաղում փակել են երեք դիտակետ

ՌԴ ՊՆ-ն հայտնում է, որ զինաթափման և կողմերի շփման գծից պահակակետերի դուրսբերման պատճառով փակվել են երկու դիտակետ Շուշիի և Ասկերանի շրջաններում և մեկ ժամանակավոր դիտակետ՝ Մարտակերտի շրջանում։

«Ռուսական խաղաղապահ զորախումբը շարունակում է առաջադրանքներ իրականացնել Լեռնային Ղարաբաղի տարածքում։ Բաքվի և Ստեփանակերտի հետ շարունակական փոխգործակցություն է պահպանվում՝ ուղղված արյունահեղության կանխմանը, խաղաղ բնակչության նկատմամբ անվտանգության ապահովմանը և մարդասիրական իրավունքի պահպանմանը։

Ռուսական խաղաղապահ զորախմբի պատասխանատվության գոտում հրադադարի ռեժիմի խախտումներ չեն արձանագրվել։

 Ի կատարումն ռազմական գործողությունների դադարեցման մասին ձեռք բերված պայմանավորվածությունների՝ ռուսաստանյան խաղաղապահների հսկողության ներքո շարունակվել է Լեռնային Ղարաբաղի զինված կազմավորումների պահեստներում զենքի, ռազմական տեխնիկայի, հրաձգային զենքի և զինամթերքի հաշվարկը։ Հոկտեմբերի 6-ի դրությամբ հանձնվել է 92 միավոր զրահատեխնիկա, 142 միավոր ավտոմոբիլային տեխնիկա, 124 միավոր հակաօդային պաշտպանության միջոց, 112 միավոր դաշտային հրետանի, ՀԿՌՀ  և ականանետեր, 1 միավոր ԱԹՍ, ավելի քան 7 հազար միավոր հրաձգային զենք և հակատանկային միջոց, շուրջ 58,5 մլն զինամթերք:

Զենքի, ռազմական տեխնիկայի և զինամթերքի պահեստների պահպանությունը կազմակերպվում է ռուս-ադրբեջանական միացյալ պահակակետերի կողմից»։